Búgin Shymkent qalasynyń ákimi Murat Áıtenov qaladaǵy zeınetkerlerdi saýyqtyrýǵa arnalǵan «Asyl júrek» ortalyǵynyń jumysymen tanysty. Onda qyzmet alýshylarmen tildesip, qarttar kúni merekesimen quttyqtady.

Memleket tarapynan ardagerlerge árqashan qamqorlyq kórsetilip keletinin jáne kórsetiletin kómektiń kólemi jyl saıyn artyp otyrǵanyn aıtqan qala basshysy bul baǵyttaǵy jumystar Prezıdenttiń memlekettik saıasatyndaǵy basym baǵyttarynyń biri ekenin atap ótti.

Shymkenttegi áleýmettik-medısınalyq «Asyl júrek» ortalyǵy 2019 jyldyń naýryz aıynda ashylǵan. Munda kúnine 4 saǵat aqysyz jartylaı stasıonarlyq jaǵdaıynda medısınalyq jáne arnaýly áleýmettik qyzmetter kórsetiledi. Ortalyq eki aýysymda jumys jasap, bir aýysymda 80 adamǵa deıin qyzmet kórsetedi.

Bul jerde kún tártibi zeınetkerlerdi dárigerlik tekserýden bastalady. Qarttarǵa qyzmet kórsetý úshin joǵary sanatty kardıolog, terapevt, nevropatolog jáne fızıoterapevt dárigerleri jumyldyrylǵan. Jýyrda mekemede fızıoterapıa kabıneti ashylyp, kópfýnksıonaldy «Polımag» qondyrǵysy iske qosyldy.

Ortalyqta jyl basynan beri 235 zeınetker eki aı kóleminde arnaýly áleýmettik qyzmet aldy. Aldaǵy ýaqytta ortalyqtyń qala aýdandarynda bólimshelerin ashý josparlanýda.

Aıta keteıik, búginde Shymkent qalasy boıynsha zeınetkerler sany – 82 351, sonyń ishinde UOS ardagerler sany – 12, tyl eńbekkerleri – 2848.