Qarataý dástúrli óner mektebiniń jáne Shymkent qalalyq «Jastar resýrstyq ortalyǵynyń» uıymdastyrýymen QR Táýelsizdiginiń 30 jyldyǵy men Jambyl Jabaevtyń 175 jyldyǵyna oraı «Qarataý men Syrdyń eli dástúrmenen jyrdyń keni» atty Qyzylorda oblysy men Shymkent qalasy dástúrli ánshileriniń konserti ótti.

– Jalpy búgin Qarataý mektebine Syr óńiriniń - Qyzylorda oblysynyń dástúrli ánshileri, jyrshylary, ónerpazary qonaqqa kelip jatyr. Bul endi resmı is-shara emes. Kezinde Birjan sal babamyz sonaý arqadan Aqshoqyǵa Abaıdy izdep barypty, bolmasa Jetisýǵa Sarany izdep barypty degen babadan qalǵan dástúrli jol bar. Sol joldy jańǵyrtyp, «sizderdiń mektepterińizdi zıarat etsek, qonaq bolyp barsaq, esesine birlesip sol jerde halyqqa rýhanı kesh syılasaq» degen syr óńiriniń dástúrli ónerpazdaryn búgin mektebimizge qonaq qylyp jatyrmyz. Bul jerde taza shyǵarmashylyq baılanys. Jyr tyńdap júregimizdi ashamyz, án tyńdap arqamyzdy keńeıtemiz degen kez kelgen kórermenimizge esigimiz ashyq. Syr ólkesiniń elimizge belgili jyrshysy «Daryn» memlekettik jastar syılyǵynyń laýreaty Kúnsulý Túrikpen qaryndasymyz bastap 13 azamaty, dástúrli ánshileri mektebimizge keldi. Keshe shaǵyn formatta kezdesý ótkizdik. Mekteptiń áý-jaıymen tanysty. Qarataý dástúrli mektebiniń negizgi baǵyty da osy dástúrli ónerdi, nasıhattaý, ulyqtaý. Sondyqtan biz «kúmis dombyra» dep aıtysymyzdy, «kúmis qalam» dep poezıa baıqaýyn ótkizdik. Endi nege dástúrli ánshilerimizge, sodan keıin kúıshilerimizge kóńil bólmeske. Buıyrsa osy is-sharadan keıin respýblıkalyq deńgeıde kúıshilerdiń baıqaýyn ótkizsek degen oı bar. Sol úlken josparlarymyzdyń bir parasy osy rýhanı baılanys. Muny Syr mektebi men Qarataý mektebiniń, bylaısha aıtqanda, qazaq tarıhyndaǵy eki úlken dástúrli óner mektebi ónerpazdarynyń kezdesýi dep qabyldaý kerek, – dedi Qarataý dástúrli óner mektebiniń dırektory Birjan Baıtýov.

Bıyl halyq poezıasynyń áıgili tulǵasy, óleń sózdiń dúldili, jyr alyby Jambyl Jabaevtyń týǵanyna – 175 jyl. Sondyqtan keshti uıymdastyrýshylar is-sharanyń bir maqsaty osy aıtýly dataǵa oraı bala jasynan dombyrany serik etip, el ishinde aqyndyǵymen tanylǵan, eki ǵasyrdyń kýási bolyp, sanaly ǵumyryn án men jyrǵa arnap, urpaǵyna qaldyrǵan Jambyldyń mol murasyn kórermenge nasıhattaý bolǵanyn aıtady.