12 qarasha kúni Ystambulda ótken túrki keńesiniń samıtinen keıin Túrkıadaǵy Ultshyl qozǵalys partıasynyń kóshbasshysy Týran Bahchelıniń prezıdent Rejep Erdoǵanǵa syılaǵan túrki áleminiń kartasy Reseı baspasózinde qyzý talqylanyp jatyr. Bul týraly Gercekgundem aqparat agenttigi habarlady.

RIA Novostı habarlaǵandaı, Týran Bahchelı Erdoǵanǵa syıǵa tartqan kartada Reseıdiń ońtústigi men Shyǵys Sibir óńirleri Túrki álemine qosylǵany atap ótilgen. Sondaı-aq kartada Balqan, Ázerbaıjan, Qazaqstan, Qyrǵyzstan, Ózbekstan, Qytaıdyń Shyńjań-Uıǵyr avtonomıalyq okrýgi, sondaı-aq Mońǵolıa men Irannyń keıbir aýdandary da bar.

Karta 12 qarasha kúni Ystambulda ótken Túrki tildes elder yntymaqtastyǵy keńesi otyrysynyń qorytyndysy boıynsha Erdoǵanǵa syıǵa tartyldy.

Otyrysta keńes ataýy "Túrki memleketteri uıymy" dep ózgertilip 2040 jylǵa deıingi kezeńge arnalǵan "Túrki áleminiń bolashaǵy – 2040" qujatyn qabyldaý týraly sheshimge qol qoıyldy.

Túrki keńesine Ázerbaıjan, Qazaqstan, Qyrǵyzstan, Túrkıa jáne Ózbekstan, al baqylaýshy retinde Túrikmenstan men Vengrıa qatysqan.