Mańǵystaýdyń marqasqa uly Ádilbek Nıazymbetov taıaýda kúlli qazaqqa taǵy qýanysh syılap, Taı­landta ótken Azıa chempıonaty­nan 81 kelige deıingi salmaqta altyn ıe­lenip, Azıa chempıony atandy. Bul týraly "Qamshy" portaly Aıqynǵa silteme jasaı otyryp habarlaıdy.

Byl­ǵa­ry qolǵap sheberi osy ýaqytqa de­ıin sharshy alańda 170-ten astam kez­desý ótkizip, onyń 150-inde jeńiske jetken. 
Ádilbek qazirgi tańda qazan aıynda Katarda ótetin Álem chem­pıo­natyna daıyndalýda. Boks­shy­myz Álem chempıonatynan jeńim­paz atansa, 2016 jyly Rıo de Janeıroda ótetin Olımpıada oıyndaryna jol­dama alady. Sondyqtan da­ıyn­dyqty myqtap qolǵa alǵan. Jarys aldyndaǵy sońǵy daıyndyq Astana qalasynda ótedi.
– Aldymen dúbirli doda aıaqtal­ǵansha kógildir ekrannyń aldynda tapjylmaı otyryp jankúıer bol­ǵan búkil otandastaryma raqmet aı­tamyn. Azıa chempıonatynan alǵan júldemdi táýelsiz elimde toıla­nyp jatqan Qazaq handyǵy­nyń 550 jyldyǵyna arnadym. Bul – babalar rýhyna taǵzym. Jalpy, dúbirli dodaǵa uzaq ýaqyt daıyndaldym, densaýlyǵyma baılanysty 10 aıdan beri sharshy alańǵa shyqpaǵan edim. Jarys óte tartysty ótti. Fınalǵa deıin úsh qarsylaspen shyqtym, olarmen judyryqtasý asa qıyn boldy dep aıta almaımyn. Aqtyq syndaǵy qarsylasym ózbekstandyq Elshod Rasýlov bolýy tıis edi. Biraq jaraqatyna baılanysty ol rıngke shyqpady, judyryqtasýdan bas tartty. Munyń ózi maǵan Allanyń jeńildigi dep oılaımyn. Naǵyz qarsylastar – aldaǵy aıda ótetin Álem chempıonatynda. Óıtkeni bul jarystan top jarǵandar Olımpıada oıyndaryna joldama alatyn­dyqtan, daıyndyq ta joǵary deń­geıde bolady. Meniń basty mejem – Olımpıada chempıony ataný! – deıdi Ádilbek.
Ádilbek Nıazymbetov 1989 jyly Sábıt pen Raıhannyń otba­synda dúnıege kelip, tórt balanyń ortasynda tárbıelengen. Otyz jylǵa jýyq ýaqyt otasqan shańy­raqta Batyrbek, Ádilbek, Qumar, Ásemaı dúnıege kelgen. Qos jup bala­laryn qazaqy tárbıemen je­tildirgen. Árqaısysynyń joǵary bilim alyp, ómirden óz oryndaryn tabýlary úshin erinbeı eńbek etken. Ádilbek sportta baǵyndyrǵan árbir jeńisin ata-anasynyń bergen tárbıesimen baılanystyrady. 
– Ákemiz jas kezinde sportpen aınalysqan. Keıin otbasylyq jaǵdaıyna baılanysty sportpen qoshtasýyna týra kelgen. Sondyqtan bolar, óziniń sportta baǵyndyr­maǵan jetistikterin balalarynyń boıynan kórgisi keldi. Ákemiz únemi «Erteń meniń ulym, tipti qyzym bolsa da boksqa beremin. Sportpen aınalysý úshin olarǵa qolymnan kelgenimdi jasaımyn» dep óz-ózine ýáde bergenin, óziniń jetpegen bıigin balalarynyń baǵyndyrǵanyn qalaǵanyn jıi aıtyp otyrady. Ákem kishkentaı kezimizde aǵam Ba­tyrbek ekeýimizdi ózi úıden daıyn­dap júrdi. Keıin bizdi dosy, belgili bapker Rashıd Seıitovtiń boks sek­sıasyna qatystyrdy. Otbasymyzda tek ákemizdiń aıtqan sózi zań, otba­sylyq sheshimdi ákemiz ǵana qabyl­daıdy. Anamyz bizdiń sharýamyzǵa múldem aralaspaıtyn, tek sabaq jaǵynan kómektesetin. Ákemiz bizdi qatal ustady, naǵyz er azamat re­tinde tárbıeledi. Sonyń nátıjesi jaman boldy dep oılamaımyn. Qandaı shyńdy baǵyndyrsam da, qandaı da bir jetistikke qol jet­kizsem, sonyń barlyǵy ata-anamnyń maǵan bergen tárbıesi, bapkerim Marat aǵamnyń daıyndyǵynyń jemisi dep bilemin. Atym Ádilbek qoı, ádildikti súıemin. Tabandy eńbek etip, jattyǵýymnan qalmaı, bapkerimniń aıtqanyn oryndap, te­mirdeı tártipke baǵynamyn. Tár­tipke baǵyna bilseń ǵana jetis­tikke jetesiń. Atamyz Baýyrjan Momysh­ulynyń «Tártipke baǵynǵan qul bol­maıdy» degen sózin únemi jadymda ustaımyn. Bolashaqta ózim de perzentterimdi ákemniń jolymen tárbıeleıtin bolamyn, – deıdi Ádilbek. 
Jalpy, Nıazymbetovter otba­­sy­ sportqa jaqyn. Áýlettiń tuń­ǵyshy Batyrbek kezinde bokspen aı­nalysyp, bokstan sport sheber­ligine úmitker atanǵan. Keıin otba­syn quryp, bul saladan alshaqtap ket­ken. Qyzdyń úlkeni Qumar bolsa, kıokýshınkaı-karateǵa qatysyp, Azıa chempıonatynda qola júldeger atanǵan. Ýaqyt óte kele ata-anasy qyz bala bolǵan soń sportpen tolyq aınalysýyna shekteý qoıyp, bilim alýyn durys sanapty. Áke armanyn júzege asyryp, úmitin aqtaý úshin sportta Ádilbek ǵana qalady. Talaı shyńdy baǵyndyrǵan keıipkerimiz jas bolsa da, Qazaqstannyń eńbek sińirgen sport sheberi, «Qurmet» ordeniniń ıegeri atandy. 
– Otbasy – bereke-birliktiń qaınar kózi. Halqymyz ákeni asqar taýǵa balaǵan. Eshqashan aldyn kesip ótpegen. «Jumaq – ananyń aıaǵynyń astynda» dep anasyn syılaǵan. «Bala – baýyr etiń» dep urpaǵyna aıryqsha qamqorlyqpen qaraǵan. Sondyqtan elimizde aýyzbirshiligi artqan úlgili otbasylardyń qatary kóbeıe bersin. Qazaǵym beıbit zamanda baqytty ǵumyr keshsin, – dep aq tilegin aqtardy bizben qoshtasarda Ádilbek Nıazymbetov. 
Sóz sońynda Ádilbek Nıazym­be­tovtyń sport salasyndaǵy jetis­tikterine toqtala ketsek. Ádilbek alǵash ret 2007 jyldyń jazynda Almaty qalasynda ótken jastar arasyndaǵy Azıa chempıonatynda je­ńimpaz atandy. Araǵa ýaqyt salyp, 2008 jyly Taraz qalasynda ótken eresekter arasyndaǵy 69 keli salmaq dárejesinde Qazaqstan chempıo­natyn jeńip aldy. Ol kezde Ádilbek 18 jasta edi. Keıin 2009 jyly Qostanaı qalasynda ótken Qa­zaqstan chempıonatynda osy jetistigin qaıtalap, eki dúrkin el chempıony atandy. 2011 jyldyń naýryz aıynan bastap Ádilbek 81 keli salmaqta shyǵa bastady. Atyraý qalasynda ótken qazaq batyrlary Mahambet Ótemisuly men Isataı Taımanulynyń júldesine arnalǵan halyqaralyq týrnırde jeńimpaz atanyp, mamyr aıynda Almaty qa­la­synda ótken Saǵadat Nurma­ǵam­betovtiń júldesinde «týrnırdiń tehnıkasy myqty boksshysy» degen ataqty ıelendi. 2010 jyly Mońǵo­lıada ótken Álem chempıonatynda 3-oryn, 2011 jyly Bakýde ótken Álem chempıonatynda 2-oryn alyp, Londonda ótetin jarysqa joldama aldy. Sóıtip, London Olımpıda­synyń kúmis júldegeri, keıin Azıa chempıony atandy. 
...Qashanda ózge memlekette Qazaqstannyń Ánurany áýelep, kók baıraǵy jelbiregende keýdemizdi maqtanysh sezimi kerneıtini ras. Sondaı kezde jattyqtyrý­shy­lary­myz ben sportshylarymyzdyń tók­ken teri zaıa ketpegenine qýana­ty­nymyz bar. Laıym, sondaı shýaqty sátterimiz, jeńisti kúnderimiz kóp bolǵaı! Sportshylarymyzdyń ba­ǵyndyrar belesteri tolastamasyn.