Baqyt Sultanov "Damý" kásipkerlikti damytý qory AQ Dırektorlar keńesiniń tóraǵasy bolyp saılandy. Bul týraly qordyń baspasóz qyzmeti habarlady.

Buǵan deıin atalǵan qyzmetti premer-mınıstr Álıhan Smaıylov atqarǵan.

"Damý" qory – memlekettik baǵdarlamalar boıynsha bızneske qoldaý kórsetetin qarjy agenti.

Baqyt Turlyhanuly Sultanov 1971 jyly 29 qarashada dúnıege kelgen. 1994 jyly Qazaq ulttyq tehnıkalyq ýnıversıtetin ınjener-elektrık mamandyǵy boıynsha, 1995 jyly Qazaq memlekettik basqarý akademıasyn ekonomıs mamandyǵy boıynsha bitirgen.

1994 jyly Qarjy mınıstrliginde qarjy naryǵynyń baǵaly qaǵazdary basqarmasynyń aksıonerleý jáne lısenzıalaý bóliminiń jetekshi ekonomısi bolǵan.

1995 jyldan bastap Qarjy mınıstrliginde bólim bastyǵy, 1996 jyly basqarma bastyǵynyń orynbasary boldy.

1997 jyly búdjettik departament dırektorynyń orynbasary qyzmetin atqarǵan.

2003-2006 jyldary – ekonomıka jáne búdjettik josparlaý vıse-mınıstri.

2006-2007 jyldary – statısıka agenttiginiń tóraǵasy.

2007 jylǵy 10 tamyzdan bastap ekonomıka jáne búdjettik josparlaý mınıstri.

2010 jyly prezıdenttiń kómekshisi bolyp taǵaıyndaldy.

2012-2013 jyldary – prezıdent ákimshiligi basshysynyń orynbasary.

2013-2018 jyldary – premer-mınıstrdiń orynbasary jáne qarjy mınıstri. 

2022 jyldyń 11 qańtarynan bastap premer-mınıstrdiń orynbasary – Saýda jáne ıntegrasıa mınıstri.