Saıasat Nurbek Nur Otan partıasy atynan Májilis depýtaty bolady. Bul týraly Nur Otan partıanyń jaýapty hatshysy Asqat Oralov habarlady.

"Saıası keńes búrosynyń qaýlysy boıynsha, Nur Otan partıasy Parlamenti Májilisi depýtatynyń bos mandatyn partıalyq tizim boıynsha Saıasat Nurbekke berý týraly sheshim qabyldandy. Tıisti sheshim Ortalyq saılaý komısıasyna jiberildi" delingen habarlamada.

Búgin Nur Otan partıasynyń saıası keńesi búrosynyń qaýlysymen 28 aqpanda Saıası keńestiń otyrysyn ótkizý týraly sheshim qabyldandy. Onda partıanyń kezekten tys XXII seziniń kún tártibi bekitiledi.

Qańtar oqıǵasynan beri májilistegi birde-bir jıynǵa qatyspaǵan Darıǵa Nazarbaeva 25 aqpanda májilis depýtaty retindegi ókilettigin toqtatý týraly sheshim qabyldaǵanyn habarlap, ortalyq saılaý komısıasyna tıisti ótinish joldaǵan.