Ýkraına prezıdenti Vladımır Zelenskıı Reseı prezıdenti Vladımır Pýtındi kelissóz ústeline otyrýǵa shaqyrdy. Bul týraly Ýkraınanyń jergilikti telearnalary habarlady.

– Adamdardyń ólimin toqtatý úshin kelissóz ústeline otyraıyq, – dedi Zelenskıı.

24 aqpanda tańerteń Reseı prezıdenti Vladımır Pýtın Ýkraınanyń shyǵysyndaǵy Donbass aımaǵyn qorǵaımyz degen jeleýmen arnaıy áskerı operasıa bastady. Ýkraına áskerıleriniń málimdeýinshe, shabýylǵa Belarýs te qatysýda.

Ýkraına qazirgi ýaqytta barynsha qorǵanyp jatyr. Alaıda batys sarapshylary Kıev birneshe táýlikte qulaıdy dep boljap otyr.

Búgin Ýkraına prezıdenti Vladımır Zelenskıı halyqqa úndeý joldap, qaqtyǵystarda 316 adam jaralanyp, 137 ýkraınalyq qaza tapqanyn aıtty. 

Reseı Syrtqy ister mınıstri Sergeı Lavrov buǵan deıin Máskeý Ýkraına qarýly kúshteri qarý-jaraǵyn tastaǵan kezde ǵana kelissózderge daıyn bolatynyn málimdegen.