Halyqaralyq Mır 24 telearnasy «Evrazıa. Istorıa ýspeha» baǵdarlamasynyń kezekti sanyn qazaqstandyq kásipker, mesenat, "Asyl adam" qaıyrymdylyq qorynyń basshysy Kóńilbaı Shúkenovke arnady.
Mesenat suhbat barysynda qarapaıym dánekerleýshiden bastap, búginde túrli salada bıznesi bar tabysty adamǵa deıingi júrip ótken joly, sol jolda kezdesken qıyndyqtardy qalaı eńsergeni týraly aıtady.
– Úıde tórt adambyz. Anam bizdiń tamaǵymyz toq, kóılegizim kók bolýy úshin tanymsyz eńbek etti. Boıymda tabandylyq, tek alǵa júretin qasıet bolsa, osy anamnan daryǵan shyǵar dep oılaımyn. 6-synypta shyǵarma jazdyq. Biri ǵaryshker, biri dáriger, biri prezıdent bolǵysy keletinin aıtsa, men jáı ǵana adamdarǵa kómekteskim keletini týraly jazdym. Bizdiń balalyq shaǵymyz keńes úkimetiniń ydyraǵan shaǵymen tuspa-tus keldi. Men dánekerleýshiniń oqýyna baryp, tynbaı jumys istedim. Ol kezde bıznesmen bolamyn dep emes, janbaǵamyn dep jumys isteıtinbiz. Úıge nan ákelýdiń múmkin bolǵan barlyq amalyn jasaıtynbyz. Bir kezderi qala-qalany aralap armatýra, qubyrlar, túrli-temir sattyq. Ózbekstan shekarasyna deıin baratynbyz. Taksımen Túrkistanǵa deıin baryp, avtobýsqa otyramyz. Avtobýstyń tómengi jaǵy tolǵan taýar, ústingi bóliginde kórpe tósenip biz jatamyz, – deıdi bıznesmen kásipkerliktegi alǵashqy qadamdaryn eske alyp.
Onyń sózinshe, sol kezderde qymbat sporttyq kólikter, jeke gıdrosıkl, kater týraly armandaǵan. Al Jezqazǵanda sonyń bárine qol jetkizgende mundaı jaǵdaı kópshilikte joq bolǵandyqtan, baılyq rýhanı lázzat syılaı almaıtynyn túsingen.
– Aptadaǵy 7 táýlikte 24 saǵat boıy jumys isteımin. Samǵaǵan, qulaǵan kezderimiz boldy. Ákimshilik tarapynan kedergi keltirgender, reıderlik áreket jasamaq bolǵandarmen ushyrastym. "Astana Trıýmf" turǵynúı keshenin salǵanda jańa kompanıa ashyp, úıdiń qasbetin jasaýmen aınalystyq. Menen tájirıbemiz bar-joǵy týraly surady. Men tájirıbemiz bar ekenin aıtyp, jańa komanda quryp, ınternetten, annan-mynnan qarap, izdenip júrip jumysqa kirisip kettik. Bizde tájirıbe joq ekenin eshkim bilmeı de qaldy. Biz quddy bárin biletindeı jumys istedik. Bızneste keıde tapsyrys alý úshin qýlyq jasaýǵa týra keletin jaıttar bolady. Eldi daǵdarys jaılap, qarjylandyrý toqtap qalǵan kezde, meniń jigitterim bir jaǵadan bas, bir jeńnen qol shyǵaryp, birlik tanytty. Maǵan aqyryna deıin sendi. Men olardyń aqysyn jemeý úshin qolymda bardyń bárin berdim. Úıimdi, kóligimdi sattym. Esimde, olar jańa jylǵa úılerine qýanyp qaıtty, sol kezde meniń qaltamda 200 myń teńge men róli oń jaqtaǵy kólik qana qaldy, – deıdi kásipker.
Kóńilbaı Shúkenov 2014 jyly "Asyl adam" qaıyrymdylyq qoryn qurady. Qordyń negizgi maqsaty azamattardy baspana jáne jumyspen qamtamasyz etý. "Asyl adam" adamdy túrine, ultyna, tili men dinine bólmeıdi. Qazaq, orys, ýkraın, polák sekildi ulttardyń ókilderi qor tarapynan baspanaly bolyp jatqany sonyń bir dáleli. Qordy qurǵandaǵy maqsat ta sol "Asyl adam" – asyl adamdardyń basyn qosady.
"Memlekettik qoldaýǵa iligýdiń birden-bir sharty adam baqytsyz bolýy kerek, al biz adamdardy baqytty qylǵymyz keledi" degen kásipker qor tarapynan tegin úı alý úshin baspanaǵa muqtajdyǵyn dáleldeý jetkilikti deıdi.
Qor qurylǵan 8 jylda 40 kópbalaly shańyraqty úımen qamtamasyz etken.
Kóńilbaı Shúkenov búginde varenık pen saǵat satýdan bastap, kıim-keshek óndirisi, elıtalyq sanattaǵy jyljymaıtyn múlik satýǵa deıingi kóptegen salalarmen aınalysady. Bulardan bólek áleýmettik jobalarmen, aýyl sharýashylyǵy kooperatıvimen shuǵyldanady. Ol bul jobany qurǵan ózi bolǵanymen, ıesi halyq ekenin, "men jasadym dep emes, biz jasadyq" degendi aýzynan tastamaıtynyn, búginde oǵan 50 myń adam senim artyp jumys istep jatqanyn aıtady.
Qazirgi tańda Kóńilbaı Shúkenov kompanıalarynyń bólimsheleri Qazaqstannyń barlyq iri qalalarynda bar. Odan bólek Ózbekstan, Qytaı, Túrkıa, Reseı elderimen seriktestik ornatqan. Jaqynda kásipti keńeıtip Dýbaı naryǵyna shyǵýdy josparlap otyr.
Bıznesmenniń basty ustanymy: mańyzdysy – aqsha emes, aqsha tek qajetti qural ǵana, mańyzdysy – jasaǵan isiń, adamǵa paıdaly bolý, kópke kómektesý.
Kóńilbaı Shúkenov kásipti jańa bastap jatqandarǵa armandaı bilińiz, armanyńyzǵa senip, tynymsyz eńbek etińiz dep keńes beredi.
Pikir qaldyrý