Jumys sapary barysynda Almaty ákimi ındýstrıaldy aımaqtyń damý perspektıvalarymen jáne problemalyq máselelerimen tanysty.

Qala basshysy Hyundai Trans Kazakhstan jeńil avtomobıl shyǵaratyn zaýyttyń jumysymen tanysty. Kásiporynda iri torapty jáne usaq torapty qurastyrý, shanaqty dánekerleý, lak-boıaý jabynyn jaǵý, ıntererdi ornatý jáne qurastyrý boıynsha óndiristik proses jolǵa qoıylǵan. Ótken jyly zaýyt 26 myń avtokólik óndirdi, el búdjetine 9,4 mlrd teńge salyq aýdaryldy. Aǵymdaǵy jyly kásiporyn tolyq qýattylyqqa shyǵyp, 45 myń avtokólik shyǵarýdy kózdep otyr.

Erbolat Dosaevqa avtokomponentter shyǵaratyn zaýyttyń jobasy tanystyryldy. Jańa kásiporyn oryndyqtardy, avtokólikterge arnalǵan plasıkalyq bólshekter men aksesýarlardy, sondaı-aq mýltımedıalyq júıelerdi shyǵarady. Zaýyt qurylysy bıylǵy jyldyń kúzine josparlanǵan. Kompanıa taǵy bir avtomobıl zaýytyn salý jáne shanaq bólshekterin shtamptaý óndirisin iske qosý josparlary týraly habarlady. Kásiporyn óndiristi lokalızasıalaýdy arttyrýǵa nıetti.

Almaty ákimi jobalyq qýaty jylyna 100 myń tonna ónim shyǵaratyn úlken dıametrli Asia Steel Pipe Corporation bolat dánekerli qubyrlar shyǵaratyn zaýytqa (kompanıa daıyn ónimderdi Ózbekstan, Túrkmenstan, Tájikstan, RF, Qytaı, Qyrǵyzstan sıaqty taıaý shetelderge eksporttaýdy josparlaýda), qýattylyǵy jylyna 20 mln birlik ónim beretin (eksporttaý josparlanýda, negizinen RF-na) Valtherm alúmını jáne bımetal radıatorlaryn shyǵaratyn kásiporynǵa, qýaty jylyna7,2 myń tonna kókónis ónidiretin BRB APK jylyjaı keshenine (qazaqstandyq ótkizý naryǵynan basqa, kompanıa ónimdi RF-ǵa jáne BAÁ-ge eksportqa jetkizedi) bardy. Jalpy alǵanda, bul jobalarǵa 71,5 mlrd teńge ınvestısıalandy, 1 200-den astam jumys orny quryldy.

Qala basshysy ındýstrıaldy aımaqtaǵy ınjenerlik ınfraqurylymynyń jaǵdaıyn kórdi. Búginde 2017 jyly salynǵan «Indýstrıaldy» temirjol stansıasyn sostavtardyń joıylý qaýpine baılanysty kóliktik baqylaý ınspeksıasy jaýyp tastaǵan. Taǵy bir nysan – kirme temirjoldar 2018 jyly aqaýlarymen qabyldandy. Temirjol stansıasy men joldardyń qurylysy turǵyndar úshin tıimdi logıstıkany qamtamasyz etip, olar óndiretin ónimniń ózindik qunyna oń áser etýi tıis. Erbolat Dosaev stansıa men kirme joldardy paıdalanýǵa berý úshin qajetti jumystardy aıaqtaýdy, sondaı-aq olardy qabyldaýdyń aqaýly faktilerin aǵymdaǵy jyldyń 30 qazanyna deıin muqıat sheshýdi tapsyrdy.

Almaty ákimi sondaı-aq 2018 jyly salynǵan, biraq paıdalanýǵa berilmegen nóser (jańbyr) káriziniń jumys istemeıtin júıesimen tanysty. Qala basshysy qala ákimdiginiń ýákiletti basqarmalaryna merdiger uıymnyń mindettemelerine tekseris júrgizip, materıaldardy quqyq qorǵaý organdaryna berýdi tapsyrdy.

Erbolat Dosaev: «Biz jaýapsyz merdigerdiń máselesin anyqtaımyz, biraq qazir bizge nóserlik káriz júıesin retke keltirip, ony ónerkásiptik paıdalanýǵa berý mańyzdy», – dedi.

Jumys sapary barysynda qala basshysy ındýstrıaldy aımaqty energıamen qamtamasyz etý jónindegi problemalyq máselelermen tanysty. Qazirgi ýaqytta №12 qosalqy stansıa ǵımaraty jóndeýdi qajet etedi, onyń tirek konstrýksıalarynda topyraqtyń túsýine baılanysty jaryqtar paıda bolǵan, búginde jóndeý-qalpyna keltirý jumystaryn júrgizý qajet. Erbolat Dosaev olardy aǵymdaǵy jyldyń qyrkúıegine deıin aıaqtaýdy tapsyrdy.  

Almaty ákimi óńirlik úılestirý keńesi músheleriniń, ındýstrıaldy aımaqtyń jumys istep jatqan jáne áleýetti rezıdentteriniń qatysýymen keńes ótkizdi. Búginde ındýstrıaldy aımaqta qyzmet kórsetetin kompanıalardyń fýnksıalaryn birden eki kompanıa oryndaıdy - bul «Almatyny ındýstrıaldy aımaǵy» JSHS jáne «AIA ınfraqurylym operatory» JSHS.

«One – stop – shop» prınsıpi boıynsha ınvestorlardyń jumysyn jeńildetý úshin "Almatynyń ındýstrıaldy aımaǵy" JSHS atynan bir ýákiletti operatordy qaldyrýdy tapsyramyn, ózgege berilgen fýnksıalar men aktıvterdi kompanıaǵa qaıtarý qajet. Osy naqty jaǵdaıda bir operator ındýstrıaldy aımaqty damytý jáne qoldaý maqsatynda jumys isteıtin bolady», – dep atap ótti Erbolat Dosaev.

Keńes barysynda ındýstrıaldy aımaqtyń aýmaǵyn keńeıtý, bir bilim berý klasteri bazasynda kadrlar daıarlaý, sondaı-aq qala turǵyndaryn kásiporyndarǵa jumysqa ornalastyrý máseleleri talqylandy.

Aǵymdaǵy jyly jalpy somasy 13,3 mlrd teńge bolatyn 13 jobany iske asyrý josparlanǵan, al 2025 jylǵa qaraı óndiristik úı-jaılardyń jalpy aýdany 250 myń sharshy metr bolatyn taǵy 40 óndiristik parkti paıdalanýǵa berý josparlanýda.