"Der Spiegel" nemis jýrnalynyń habarlaýynsha, Germanıanyń BND barlaý agenttigi Reseı áskerleri Ýkraınanyń Býcha qalasynda beıbit turǵyndardy óltirý máselesin talqylap jatqany estiletin radıotrafıkterge qol jetkizgen.

BND ázirge bul máselege qatysty ashyq túsinikteme bergen joq.

Ýkraına "reseılik kúshter Býchada 300-den astam beıbit turǵyndy óltirdi" deıdi. Al Máskeý buǵan qatysy joq ekenin aıtady.

Býcha kósheleriniń máıitke tolyp jatqanyn aıǵaqtaıtyn sýretterden keıin halyqaralyq qaýymdastyq Reseıdi aıyptaǵan. Sýretterden keı jábirlenýshilerdiń qolyn baılap, basynan oq atqany kórinedi.

Ýkraına prezıdenti Vladımır Zelenskıı Býchadaǵy qyrǵyn úshin Reseıdi "genosıd jasady" dep aıyptady, Máskeý aıypty úzildi-kesildi joqqa shyǵardy.

Pýtın 24 aqpanda Ýkraınaǵa shabýyldaý týraly buıryq bergennen keıin Reseı áskerleri Býchany basyp alyp, qaladan bir aıdan astam ýaqyttan keıin shyqqan.

"BND barlaý málimetteri sársenbi kúngi brıfıń kezinde nemis parlamentinde jarıalandy" dep habarlady beısenbide "Der Spiegel".

Bir radıohabarlamada reseılik sarbazdar adamdardy jaýapqa tartyp, keıin olardy atyp tastaý týraly sóılesken kórinedi.

Taǵy birinde bir sarbaz velosıped mingen bireýdi atyp tastaǵany týraly aıtqan.

Reıter agenttigine aty-jónin atamaǵan qaýipsizdik qyzmetkeri "[Germanıa] federaldyq úkimettiń qolynda Býchada Reseıdiń qylmys jasaǵany týraly dálelder bar ekeni ras" dep aıtqan.

Reseı Býchadaǵy jaǵdaı týraly túsirilimder "jalǵan óli deneler" kórsetilgen, orys áskerleri qaladan shyqqannan keıin "sahnalanǵan" deıdi. Alaıda Nú-Iork Taıms jarıalaǵan 19 naýryzda jasandyserikten túsirilgen sýretter Reseıdiń málimdemesine tikeleı qaıshy keldi.

"Maxar" tehnologıalyq kompanıasy jasandyserik arqyly túsirgen fotosýretter Býchadaǵy máıitterdiń ornymen sáıkes keledi.