Ortalyq komýnıkasıalar qyzmetinde "Ekinshi respýblıka. QR Prezıdentiniń ókilettiligi qalaı ózgeredi" taqyrybymen baspasóz jıyny ótip, ádilet mınıstri Qanat Mýsın prezıdent Qasym-jomat Toqaevtyń bıylǵy joldaýda aıtqan prezıdenttiń jaqyn týystaryna saıası laýazymdar men kvazımemlekettik qurylymdardy basqarýǵa tyıym salý týraly tapsyrmasy qalaı júzege asyrylatynyn habarlady.

Mınıstrdiń aıtýynsha, zańnama boıynsha jaqyn týystar ata-analar, balalar, asyrap alýshylar, asyrap alynǵandar, ata-anasy bir jáne ata-anasy bólek aǵa-inileri men apa-sińlileri, atasy, ájesi, nemereleri jatady.

Sonymen qatar, sybaılas jemqorlyqqa qarsy is-qımyl týraly zańnamaǵa sáıkes, erli-zaıyptylardyń jaqyn týystary úshin shekteýler belgilengen.

Budan bólek prezıdent jarlyǵymen saıası jáne ákimshilik memlekettik qyzmetshiler laýazymdarynyń tizilimi aıqyndalyp, olarǵa mınıstrler, olardyń orynbasarlary, ákimder, memlekettik organdardyń basshylary jáne basqalar jatqyzylǵan. Buǵan memlekettik qatysy bar kvazımemlekettik uıymdar da osy sanatqa kiredi. Iaǵnı, zań kúshine engen soń prezıdenttiń aǵasy, ápkesi, balalary "Samuryq Qazyna", "Báıterek" sıaqty uıymdarda basshylyq qyzmetter atqara almaıdy.

Prezıdent bıylǵy joldaýynda sýperprezıdenttik júıeden bas tartý máselesin kóterip, tómendegideı usynystardy jarıalaǵan:

♦ Prezıdenttiń partıaǵa múshe bolýyna zań júzinde tyıym salý;

♦ Ortalyq saılaý komısıasy tóraǵasy men músheleri, esep komıteti, konstıtýsıalyq keńes músheleri partıa quramynan shyǵýǵa tıis;

♦ Ákimderge partıa fılıaldaryn basqarýǵa tyıym salý;

♦ Prezıdenttiń jaqyn týystaryna saıası laýazymdar men kvazımemlekettik qurylymdardy basqarýǵa tyıym salynýǵa tıis.