Ońtústik Koreıadaǵy Inchhon áýejaıynan qashyp, bıiktigi 3,6 metr qorshaýdan sekirip ketken eki qazaqstandyq sottalǵaly jatyr.

"Otandastarymyz ózge eldiń zańnamasyn buzǵandyqtan, olardy Qazaqstanǵa deportasıalaý týraly sóz qozǵaý múmkin emes. Eki qazaqstandyq qylmystyq kodekstiń úsh baby boıynsha sottalady", – dep habarlady QR SİM resmı ókili Aıbek Smadıarov.

Mınıstrliktiń málimetinshe, qazaqstandyqtar Ońtústik Koreıa zańnamasynyń úsh babyn buzdy dep aıyptalyp jatyr. Olar :

♦ ımıgrasıalyq baqylaý jáne elge zańsyz kirý týraly zań;

♦ elde zańsyz bolý;

♦ áýejaı men onyń obektileri týraly zańnamany buzyp, materıaldyq zalal keltirý;

"Qazir eki qazaqstandyq ta Inchhonnyń kóshi–qon ortalyǵyndaǵy tergeý ızolátorynda jatyr. Ońtústik Koreıa zańnamasyna sáıkes tergeý sharalary úsh aıǵa  sozylýy múmkin, sodan keıin is prokýratýraǵa beriledi. Ońtústik Koreıanyń quzyrly organdary tergeý barysynda istiń egjeı–tegjeıin jarıalamaıdy", – dedi Aıbek Smadıarov.

Qazaqstannyń Ońtústik Koreıadaǵy Elshiligi jergilikti quqyq qorǵaý organdarymen jáne ustalǵan azamattardyń týystarymen turaqty baılanys ornatyp otyr.

"Bilimsizdik jaýapkershilikten bosatpaıdy. Olar Ońtústik Koreıa zańyn buzyp, óreskel qatelik jasaǵandyqtan, elge qaıtarý múmkin emes. Bul jaǵdaıda daýlasýymyz orynsyz. Ońtústik Koreıada jumys isteý úshin ózge el azamattaryna arnaıy vıza kerek. Basqa jolmen jumys jasaý zańsyz bolyp tabylady" – dep habarlady QR SİM resmı ókili.

Eske sala keteıik, naýryzdyń 24 kúni eki qazaqstandyq Ońtústik Koreıaǵa zańsyz kirip, Inchhon áýejaıyndaǵy deportasıa ushaǵyn kútý bólmesinen qashyp ketken bolatyn. Olardyń biri jergilikti dúkennen ustalsa, ekinshisi birneshe kúnnen keıin óz erkimen polısıaǵa berilgen edi.