"Biz qara halyqpyz, kóship ketetin basqa jerimiz, basqa úıimiz joq" degen sózi úshin 4 jyl túrmege kesilgen belsendi Faıl Alsynovty jaqtaǵan 10 myńdaı adam búgin Baımaq qalasynda mıtıńke kóterildi.

Halyq "bostandyq!" jáne "fashıser!" dep urandatýda.

Mıtıńti taratýǵa tyrysqan qarýly jasaqqa qarsy jınalǵandar qar men muz atyp, tarqaýdan bas tartýda.

Internet buǵattaldy.

2020 jyly ekstremıst dep tanylyp, Reseıden ketip qalǵan bashqurt belsendisi Rýslan Ǵabbasov búkil Bashqurtstan Respýblıkasy boıynsha "baǵynbaý sharasyn" bastaýǵa shaqyrdy.

Bashqurttar óz tarıhynda otarlaýshy Reseıge qarsy buǵan deıin bes ret kóterilgen.

Saıasattanýshy Abbas Gallámov bul jolǵy ereýildi ulttyq kóterilis dep baǵalaıdy. "Kezinde dál osyndaı kóterilis KSRO-ny kúıretken" deıdi.

Respýblıkanyń basshysy Habırovty bashqurt jurty "Máskeýdiń qoly" dep qabyldaıtyndyqtan, bul tolqýdan keıin halyqtyń Máskeý men Pýtınge degen qahary tek kúsheıe túspek.

Sońǵy aqparatqa saı, Máskeý bıligi Baımaqtaǵy narazy halyqty taratý úshin "Rosgvardıa" áskerin jóneltip jatyr.

Bashqurttar – azattyqty ańsap kele jatqan Reseı Federasıasy quramyndaǵy baıyrǵy halyq. Olar ózderin "bashkort" dep ataıdy. Oǵyz-túrik tilinen alǵanda, bash – bas, kort – qasqyr degen maǵynany bildiredi. Kezinde olardyń Qımaq qaǵanaty degen qýatty memleketi bolǵan. Bashqurt taıpasy Altyn Ordanyń quramynda bolǵan. Altyn Orda qulaǵan soń Qazan, Noǵaı jáne Sibir handyqtarynyń quramyna kirdi. Tarıhı derekterde, batys bashqurt taıpalary shamamen 1554 - 1555 jyldardyń basynda Reseıdiń quramyna kirdi delinedi. Bashqurttar ózderiniń shyǵý tegi, taıpalyq quramy, salt-dástúri, ómir salty, mádenıeti jaǵynan qazaq halqymen týystas halyq. Tarıhı turǵydan qaraǵanda, qazaq halqynyń kóptegen taıpalary bashqurttarda da bar: qypshaq, tama, tabyn jáne taǵy basqasy. Bashqurttardyń dinı senimi – sýnnıttik musylman.