Ótken aptada «Otandyq «Asyl arna» dinı-tanymdyq telearnasy sheteldik uıymdar tarapynan qarjylandyrylýy múmkin» degen aqparat qylań berdi. Oǵan birqatar aqparat quraldarynda Vıkılıks saıtynda Saýd Arabıasynyń basshylary arasyndaǵy hattardyń jarıa bolǵandyǵy, ol hattarda osy eldiń Mádenıet mınıstrligi qyzmetkerleri «Asyl arnaǵa» qarajat bólý máselesin talqylaǵandyǵy aıtyldy.

Vıkılıkstegi hattan bastalǵan áńgime qoǵamda biraz sóz bolyp, tipti, parlament tórinde de kóterilgen. Májilis depýtaty Aıqyn Końyrov BAQ –ta jaryq kórgen aqparat arnany tekserýge tolyq negizdeı alady dep esepteıdi. «Memlekettik organdar BAQ-ta qyzý talqylanyp jatqan bul jaǵdaıǵa mán berýi tıis. Olardyń ne týraly aıtyp, qandaı aqparat taratatyndyǵy týraly  saraptama júrgizý kerek. Meniń bilýimshe, bundaı arnany tirkeý men taratý ońaı sharýa emes. Arna tirkelý aldynda óziniń kontenti týraly baǵdarlama jasap ótkizdi dep esepteımin. Men ózim BAQ salasynda qyzmet atqarǵanmyn, sondyqtan barlyǵyn baqylap otyratyn mamandardyń bar ekenin bilemin. Bul ne adamı faktor, nemese jınaqtalǵan «syndarly toptyń» áseri. Men osy eki nusqany usyna alamyn»,- dep óz oıyn ortaǵa salǵan. 

Al,  májilis depýtaty  Asqat Bekenov «Asyl arnany» ýaqyty bar kezde qaraıtynyn, biraq arnadan eshqandaı úgit-nasıhat úlgilerin baıqamaǵandyǵyn aıtty.  «Bul arnany shetel qarjylandyrady degendi estimeppin. Atalmysh máselege baılanysty quqyq qorǵaý organdary tekseris júrgizýi tıis. Sáláfızm men vahabbızm ıdeıasy bizdiń qoǵamda baıaǵyda-aq beleń alyp ketken. Tipti osy ıdeologıany ustanatyndar da artyp keledi. Biraq ol bizdiń ustanatyn dástúrli ıslamymyzǵa qaıshy keledi»,-dep esepteıdi Bekenov.

Aqparat quraldarynda dinı basqarma men osy salany úılestirýshi memlekettik mekemelerdiń de resmı ustanymdary birinen soń biri jaryq kórýde. QR Mádenıet jáne sport mınıstrligi din isteri jónindegi komıtet arna jumysyna baılanysty mynany aıtady:

• Telearna mazmundyq jaǵynan Qazaqstan musylmandary dinı basqarmasymen tyǵyz baılanysta jumys isteıdi. Tipti, arna, QMDB jáne din isteri komıteti arasynda arnaıy memorandým da bar. Onda Qazaqstan halqynyń dástúrli dinı tanymyn nasıhattaý maqsatynda baǵdarlamalar birlese ázirlenedi. «Asyl arna» stýdıasynda QMDB-nyń bir ókili redaktor retinde jumys isteıdi. Arna baǵdarlamalarynyń mazmuny Qazaqstan zańdaryna qaıshy kelmeıdi.

Musylmandar dinı basqarmasy da arnamen tyǵyz áriptestik baılanys ornaǵanyn rastap otyr. Qos tarap ıslam dininiń qundylyqtaryn Ábý-Hanıfa mázhaby ustanymdaryna saı nasıhattaýda birlese jumys isteıdi delingen múftıat taratqan habarlamada.

Elektrondy aqparat quraldarynyń jumysyn úılestirýshi taǵy bir salalyq organ ınvestısıa jáne damý jónindegi mınıstrliktiń baılanys, aqparattandyrý jáne aqparat komıteti de arna jumysynda «Telaradıotaratý» týraly zań talaptarynyń buzylýy anyqtalmaǵanyn aıtyp otyr.

Al, arna basshysy, aqyn Muhamedjan Tazabekovtyń ózi Total.kz agenttigine bergen jaýabynda:

«Bar jaýapkershilikpen málimdeımiz: «Asyl arna» eshýaqytta Saýd Arabıasy úkimetinen de, bul eldiń ózge ókilderinen de, odan basqa shet memleketterden de qarjylaı kómek alǵan emes. Hattaǵy jaǵdaıǵa keletin bolsaq, bizge kelesi jaıt belgili: 2007 jyly «Asyl arna» derekti fılmder túsiretin stýdıa retinde qalyptasqan kezde, atalmysh tulǵa burynǵy KSRO elderine taralatyn «Mekke» atty orys tildi telearna ashpaq bolǵan. Onyń shtab-páteri Er-Rıadta ornalasady dep josparlanǵan. Óz kezeginde arna ujymy shetelden qarjylandyrý múmkindigine de, ózgelerdiń arna ıdeologıasyna áser etý múmkindigine de stýdıa retinde qalyptasqan sátinen bastap, eshýaqytta jol bermeý kerektigin jaqsy túsinedi. Búginde arnanyń ustanatyn jalǵyz ıdeologıalyq baǵyty memleketimizdiń saıasaty men múftı Erjan qajy Malǵajuly basshylyq etetin Qazaqstan musylmandarynyń rýhanı basqarmasyna (QMRB) ǵana súıenedi”, – deıdi.

PS.: Sonymen, eldegi dinı-tanymdyq baǵyttaǵy jalǵyz telearna týraly qaq aıyrylǵan pikirlerdiń uzyn-yrǵaǵy osyndaı. Biz eki taraptyń da týyndaǵan máselege oraı ustanymdaryn bóle-jarmaı usynýǵa tyrystyq. Aqparat quraldarynda sóz bolǵan kúdikti jaıttarǵa qatysty oı qorytýdy oqyrmannyń óz erkine qaldyrdyq.

Darqan Muqan