Reseı 2025 jyly Baıqońyr ǵarysh aılaǵynda áskerı zymyrandardy ushyrmaıdy jáne synaqtan ótkizbeıdi. 

Reseı Qazaqstan úkimetine "2025 jylǵa arnalǵan ǵarysh apparattaryn ushyrý josparyn" dıplomatıalyq arnalar arqyly tapsyrdy. Atalmysh qujat "Ashyq NQA" portalynda jarıalandy.

“Qazaqstan Respýblıkasynyń Syrtqy ister mınıstrligi usynylǵan josparda áskerı maqsattaǵy ǵarysh apparattaryn ushyrý, sondaı-aq "Baıqońyr" ǵarysh aılaǵynan zymyrandardy synaqtan ótkizý joq ekenin habarlady”, – delingen habarlamada. 

Qujatqa sáıkes, 2025 jyly Baıqońyr ǵarysh aılaǵynan ǵarysh apparattaryn ushyrý "Reseıdiń ǵarysh qyzmeti" memlekettik baǵdarlamasy, halyqaralyq yntymaqtastyq baǵdarlamalary jáne komersıalyq jobalar aıasynda júzege asyrylady.

Aıta keteıik, kelisimshartqa sáıkes Reseı jyl saıyn 30 qarashadan keshiktirmeı Qazaqstanǵa ǵarysh apparattaryn ushyrý jáne ǵarysh aılaǵynan zymyrandardy synaqtan ótkizý josparyn berýge mindetti.