PETROPAVL. QazAqparat - 19 qazanda Qazaqstanda azamattyq qorǵanys qyzmetteriniń qurylǵanyna 20 jyl toldy. Soltústikqazaqstandyq qutqarýshylardy osynaý kásibı merekelerimen oblys ákimi Erik Sultanov quttyqtady. Bul týraly óńir basshysynyń baspasóz qyzmeti habarlady.
Oblys ákimi TJ qyzmetkerleriniń kómekke birinshi bop jetetin erekshe mısıasyn atap ótti.
«Sizder adam ómirin saqtap qalý úshin bar kúsh-jiger, bilimderińizdi jumsaısyzdar. Kúndelikti eńbekterińizben el halqyn, aýmaqty tabıǵı jáne tehnogendik sıpattaǵy tótenshe jaǵdaılardan qorǵaý salasyndaǵy memlekettik saıasatty iske asyrýdy qamtamasyz etip kelesizder. Qyzmettik mindetterińizdi adal atqaryp, erlik kórsetkenderińiz úshin alǵys bildiremin. Shyn júrekten otbasylyq baqyt, myqty densaýlyq, baqyt tileımin, aýyr da izgi isterińizge tabystar tileımin», - dep quttyqtady ol.
Oblystyń órtke qarsy qyzmet organdarynda kásibılik tanytyp, adal eńbek etkeni úshin ári azamattyq qorǵanys organdarynyń qurylǵanyna 20 jyl tolýyna oraı oblys ákiminiń qurmet gramotasyn úsh soltústikqazaqstandyq ıelendi, taǵy tórteýi alǵys hat aldy.
QR İshki ister mınıstriniń atynan «Qazaqstan Respýblıkasy İshki ister mınıstrligi Tótenshe jaǵdaılar komıtetine 20 jyl» medali azamattyq qorǵanystyń 18 qyzmetkerine jáne ardagerlerine tabys etildi.
Saltanatty jınalys sońy konserttik baǵdarlamaǵa ulasty.
Sondaı-aq merekelik shara aıasynda zamanaýı qutqarý tehnıkalarynyń baıqaýy ótti. Oǵan oblys ákimi de qatysty.
Búgin SQO TJD-de 927 adam qyzmet etedi. Jyl basynan bastap 126 adam ómiri qutqaryldy, 1300-den astam adam evakýasıalandy. Ótken 9 aıda departament qyzmetkerleri 1500 shaqyrtýǵa shyqty.
Derekkóz: QazAqparat
