2025 jyldyń 4–5 qazan kúnderi Zerendide ótken «ZEREN photo fest» fotofestıvali aıasynda qazaqstandyq BAQ fototilshileri EUÝ-dyń jýrnalısıka jáne áleýmettik ǵylymdar fakúltetiniń stýdentterine sheberlik sabaǵyn ótkizdi. İs-sharany EUÝ-dyń Aqparattyq ortalyǵy men jýrnalısıka jáne áleýmettik ǵylymdar fakúlteti uıymdastyrdy. Fotofestıval ýnıversıtettiń 30 jyldyǵyna oraı ótti.

Festıválge áleýmettik jáne ınfraqurylymdyq damý jónindegi prorektor Lázzat Tólegenqyzy, jýrnalısıka jáne áleýmettik ǵylymdar fakúltetiniń dekany Nurjan Qýantaev, «National Geographic Kazakhstan» jýrnalynyń fototilshisi Erbolat Shadrahov, «Egemen Qazaqstan» gazetiniń fototilshisi Erlan Omarov, QR Parlamentiniń fototilshileri Talǵat Tanybaev pen Jandáýlet Ómirhanuly, «QazAvtoJol» AQ ókili Qaljan Tursynbaev, «Egemen Qazaqstan» gazetiniń jaýapty hatshy orynbasary Almas Manap, Aqparattyq ortalyqtyń basshysy Erbol Erdenbek jáne oqytýshylar men stýdentter qatysty.

Quttyqtaý sózinde Lázzat Tólegenqyzy festıváldiń bıyl úshinshi ret uıymdastyrylyp otyrǵanyn atap ótti:

«Dástúrli «ZEREN photo fest» – stýdentter úshin jańa bilim men tájirıbe alýdyń, al fototilshiler úshin kásibı tájirıbe almasýdyń tamasha alańy. Biz bul sharany tabıǵat aıasynda ótkizýimizdiń ózindik máni bar. Mundaı orta shyǵarmashylyq adamdarǵa shabyt berip, qala tirshiliginen demalýǵa múmkindik týǵyzady. Barshańyzǵa jemisti jumys, jańa ıdeıalar men jaqsy kóńil-kúı tileımin», – dedi prorektor.

Jýrnalısıka jáne áleýmettik ǵylymdar fakúltetiniń dekany Nurjan Qýantaev qatysýshylardy baıqaý erejelerimen tanystyrdy:

«Festıvál aıasynda stýdentter óz tálimgerleriniń jetekshiligimen túsirgen fotosýretterin usynady. Baıqaý jumystary «Peızaj», «Portret» jáne «Fotoreportaj» janrlary boıynsha baǵalanady. Qorytyndysynda qazylar alqasy úzdikterdi anyqtaıdy», – dedi ol.

Festıvál barysynda mamandar stýdentterge fotoóner, jańalyq daıyndaý, baspasóz relızderin ázirleý sıaqty taqyryptarda sheberlik sabaqtaryn ótkizdi.

Baıqaý qorytyndysy boıynsha Gran-prı ıegerleri – «National Geographic Kazakhstan» jýrnalynyń fototilshisi Erbolat Shadrahov jáne onyń shákirtteri Eldar Obaıdýllın, Jansaıa Slamova, Zarına Taılaq pen Beknur Qaragúl atandy.

Birinshi oryndy «Egemen Qazaqstan» gazetiniń fototilshisi jáne jaýapty hatshy orynbasary Erlan Omarov pen Almas Manap, sondaı-aq olardyń shákirtteri – Erkejan Sansyzbaı, Erasyl Nurlybekuly jáne Álı Ábdibekuly ıelendi.

Ekinshi orynǵa Talǵat Tanybaev pen Jandáýlet Ómirhanuly bastaǵan top – Baýyrjan Ómirzaqov, Mansýr Iahýdınov, Kamıla Moldahmetova, Aıajan Mentaı, Erkenaz Keńshilikova jáne Aısulý Serikova ıe boldy.

Úzdik úshtikti Qaljan Tursynbaev pen onyń komandasy – Marat Baýyrjan jáne Asqar Seıilbek túıindedi.

«Úzdik fotoreportaj» nomınasıasynda Erlan Omarov, Almas Manap, Erkejan Sansyzbaı, Erasyl Nurlybekuly jáne Álı Ábdibekuly jeńiske jetti.

«Úzdik portret» nomınasıasynda Talǵat Tanybaev pen Jandáýlet Ómirhanuly, sondaı-aq olardyń shákirtteri – Baýyrjan Ómirzaqov, Mansýr Iahýdınov, Kamıla Moldahmetova, Aıajan Mentaı, Erkenaz Keńshilikova jáne Aısulý Serikova jeńimpaz atandy.

«Úzdik fototilshi» nomınasıasynda Erbolat Shadrahov pen onyń shákirtteri – Eldar Obaıdýllın, Jansaıa Slamova, Zarına Taılaq jáne Beknur Qaragúl ıelendi.

Jeńimpazdar dıplomdarmen jáne estelik syılyqtarmen marapattaldy.