ALMATY. QazAqparat - «Almaty týr-2015» halyqaralyq velojarysynyń deńgeıi jyldan jylǵa joǵarylap keledi. Men jarys ótetin joldy ózim tekserip shyqtym.
Trassa jarys ótkizýge saqadaı saı. Búgin Almatyda ótken arnaıy baspasóz máslıhaty barysynda «Almaty týr-2015» halyqaralyq velojarysynyń dırektory, Halyqaralyq velosıpedshiler odaǵynyń komısary Djek Vatson osylaı málim etti.
«Men velojarystyń uıymdastyrý komıtetinde birneshe jyldan beri jumys istep kelemin. «Almaty týr» velojarysynyń deńgeıi jyldan jylǵa joǵarylap keledi. Men buǵan óte rızamyn. Men jaqynda Almatyǵa kelip ketken edim. Uıymdastyrý komteti qyrýar jumystar atqardy. Munda Halyqaralyq velosıpedshiler odaǵynyń barlyq talaptary oryndalyp jatyr. Men jarys jolyn ózim tekserip shyqtym. Trassa halyqaralyq deńgeıde jarys ótkizýge saqadaı saı», - dedi Djek Vatson.
Bıyl osymen úshinshi ret ótkizileıin dep otyrǵan halyqaralyq velojarysqa Eýropa men Azıa elderinen 20 komanda qatysady. Jarys jolyna barlyǵy 150 veloshabandoz shyǵady. Olardyń ishinde eki kásipqoı - «PRO Team Astana» jáne reseılik «Katusha» komandalary bar. Sonymen qatar «Rusvelo» prokontınenttik komandasy, 14 qurlyq jáne Qazaqstan, Ózbekstan jáne Mońǵolıanyń ulttyq qurama komandalary qatysady.
Óz sózinde «Qazaqstannyń sport tehnologıalary» kompanıasynyń bas dırektory Arnur Ybyraev júldelik qordyń bıyl da ózgerissiz qalatyndyǵyn jetkizdi.
«Júldelik qor ótken jyldardaǵydaı bolyp qalady. Iaǵnı, birinshi oryn alǵan keloshabandozǵa 15 myń eýro, ekinshi oryn alǵanǵa 10 myń jáne úshinshi oryn alǵan veloshabandozǵa 5 myń eýro tólenedi. Bul basqa halyqaralyq deńgeıdegi velojdarystarǵa qaraǵanda qomaqty soma. Óıtkeni bul birkúndik velojarys. Soǵan bola shet elderden, basqa qurlyqtan ushyp kelý ońaı emes, ıaǵnı tıimdi bola bermeıdi. Sondyqtan biz qomaqty júldelik qormen qatar, velosıpedshilerdiń ushý bıleti men júkteri boıynsha shyǵyndardy óz moınymyzǵa alyp otyrmyz. Sonymen qatar, jarysqa qatysqany úshin veloshabandozdarǵa belgili mólsherde ótemaqy tólenedi», - dedi A. Ybyraev.
Aıta ketelik, bıyl «Almaty týr-2015» halyqaralyq velojarysyn 4 qazan kúni tikeleı efırde kúndizgi saǵat 13:00-den 14:00-ge deıin «Eýrosport-2» telearnasy kórsetedi. Al elimizde «Qazaqstan», «Almaty» jáne «Qazsport» arnalary tolyq kólemde kórsetedi.
Jarys ústimizdegi jyly 4 qazan kúni Almaty qalasynda tańǵy saǵat 09:00-de bastalyp, shamamen saǵat 14:00-de aıaqtalady. Marapattaý rásimi osy ýaqytta.
Veloshabandozdar ál-Farabı dańǵyly boıymen 31 shaqyrymnan turatyn alty aınalymdy basyp ótedi, ıaǵnı jarys joly 186 shaqyrymdy quraıdy.
