Ústimizdegi jyly qyrkúıek aıynda «Nur Otan» partıasy Lısakovsk qalalyq fılıalynyń qoǵamdyq qabyldaý bólimine «Ýraldomnoremont – L» jaýapkershiligi shekteýli seriktestiginiń bir top jumysshysy ózderiniń tórt aı boıy eńbekaqy almaǵanyna, kásiporyn dırektory Sergeı Ilıch Jerákov kúnde «erteńmen» aldap júrgenine shaǵymdanyp, máseleni sheshýge kómektesýin ótingen. Osyǵan oraı biz Qostanaı oblysynyń Lısakovsk qalasyna habarlasyp, birneshe jumysshymen máseleniń anyq-qanyǵyn surap bilgen edik.
Valerıı DÝDKO, «Ýraldomnoremont – L» JSHS jumysshysy:
 – Meniń «Ýraldomnoremont – L» kásipornynda jóndeýshi maman bolyp jumys jasap kele jatqanyma úsh aıdan asty. Kásiporyn basshysy Sergeı Jerákov bastapqyda maǵan «aılyǵyńyz 60 myń teńge bolady» dep ýáde berdi. Ju­mysymyz óte aýyr. Eńbek zańynda be­kitilgen kúnine 8 saǵattyń ornyna ýa­qytpen sanaspaı 12 saǵat jumys jasadyq. Ókinishke qaraı, úsh aıdan beri kók tıyn eńbekaqy alǵan joqpyz. Óıtkeni otbasymda áıelim jáne tórt balam bar. Olardyń eń úlkeni 8 jasta da, kish­kentaıym ekide. Buǵan qosa, áıelimniń besinshi nárestege aıaǵy aýyr. Otbasymmen birge osyndaǵy jataqhananyń eki ból­mesin aıyna 22 myń teńge tólep, jaldap turamyn. Jataqhanaǵa qaryzym da jınalyp qaldy. Jataqhana qojaıyny kún saıyn «bólmeni bosat!» dep álek salýda. «Qystyń kózi qyraýda shıtteı balalarymyzben dalada qańǵyp qalamyz ba?» degen úreı boıymyzdy bıleýde. Sondyqtan zańsyzdyqpen kúresip kele jatqan – «Nur Otan» partıasynan kómek kútemiz. Osy iske sizder aralasyp, «Ýral­domnoremont – L» JSHS-niń basshysy S.I.Jerákovtan barlyq eńbekaqymyzdy alyp berseńizder eken degen úmittemiz. 
Turash BERMUHAMBETOV, «Ýraldomnoremont – L» JSHS jumysshysy: 
– Men jas otbasynyń ókilimin. Shańyraq kótergenime birer aıdyń júzi boldy. Jaldamaly páterde kún keshý­demiz. Aıtpaǵym, bizdiń brıgada jumys­shylarynyń aılyq kórmegenine úsh-tórt aıdyń júzi boldy. Sondyqtan sizderden úlken kómek kútemiz. Bizge qınalǵanda qol ushyn berip, tyǵyryqtan shyǵar­sańyzdar eken. Ózimiz «Ýraldomnoremont – L» jaýapkershiligi shekteýli seriktes­tiginiń bastyǵy Sergeı Jerákovtan «qa­shan jalaqy beresiz?» dep surasaq boldy, alýan túrli syltaý aıtyp, taısaqtaıdy. Sondyqtan biz oryn alyp otyrǵan zań­syzdyqty jazyp, qalalyq prokýratýra men sotqa da aryzdandyq. Meniń «Halyq bankinen» alǵan kredıtim bar. Aılyqtyń keshigýi saldarynan birneshe aı boıy bank qaryzyn tóleı almaı otyrmyn. Sondyqtan biz «Nur Otan» partıasynan zor úmit kútemiz. 
Al «Nur Otan» partıasy Lısakovsk qalalyq fılıalynyń esep, statısıka jáne qoǵamdyq qabyldaý sektorynyń meńgerýshisi Nurlan Batyrhanuly Baldıkov bolsa, «Ýraldomnoremont – L» JSHS dırektory Sergeı Ilıch Jerákovpen jolyǵyp, máseleniń mán-jaıyn surap bilgenin, sonda kásiporyn basshysynyń Rýdnyı qalasyndaǵy tap­syrys berýshi «SSGPO» AQ-tyń atqa­rylǵan jumysqa aýdarylýy tıisti qar­jyny der kezinde aýdarmaýy saldarynan jumysshylarǵa eki aıdyń jalaqysy ke­shiktirilgendigi týraly habarlaǵanyn jet­kizdi. Buǵan qosa, «Nur Otan» partıasy Lısakovsk qalalyq fılıalynyń bólim basshysy oryn alǵan oqıǵany qala pro­kýrory Erkin Taıkeshovke tapsyrǵan. Jumysshylarmen júzdesken qala pro­kýrorlary olardyń málimdemesine oraı kásiporyn basshysynan jumysshylardyń jalaqysyn berýdi talap etken. Alaıda, talaptyń mezgilinde oryndalmaýyna baı­lanysty Lısakovsk qalalyq pro­kýra­týrasy atalmysh kásiporynda eńbek zańdylyǵynyń qadaǵalanýyn teksergen. Tekserý nátıjesinde «Ýraldomnoremont – L» JSHS-de eńbek zańdylyǵynyń óreskel buzylyp kelgeni anyqtalyp, kásiporynǵa 250 AEK (MRP) kóleminde aıyppul salyndy.
Biz Lısakovsk qalasyna telefon shalyp, «Ýraldomnoremont – L» JSHS-niń dırektory Sergeı Ilıch Jerákov myrzaǵa habarlastyq. 
– Ras, qazirgi kúni bizdiń kásiporyn osyndaǵy 21 jumysshyǵa birneshe aıdyń eńbekaqysyn bere almaı otyr. Munyń sebebi, bizben kelisim jasaǵan Rýdnyı qalasyndaǵy merdiger kompanıa tıisti qarjyny bizdiń esepshotymyzǵa áli kún­ge deıin aýdarmaı, kásiporyndy ty­ǵy­ryq­qa tirep otyr. Al biz bolsaq, tap­syrys berýshi «SSGPO» AQ-tyń tap­syr­masyn osydan birneshe aı buryn bel­gi­lengen merzimde tolyq oryndadyq. Alaıda, tapsyrys berýshiniń ýádesinde turmaýy saldarynan, jumysshylarǵa jalaqy bere almaı otyrmyz. 
– Sonda jumysshylarǵa tıesili birneshe aıdyń eńbekaqysyn qalaı tólemeksiz?
– Shynymdy aıtsam, qazir ne iste­rim­di bilmeı júrmin. Degenmen, bir-eki apta kútsek, tıesili qarjy shotymyzǵa túser degen úmitim bar. Al jumysshylar ýaqyt­pen sanaspaı jumys jasady. Sondyqtan olarǵa tıesili jalaqy berilýi qajet. Ótken juma kúni qandaı kelisimdi tapsy­rysty atqarǵanymyz jáne onyń keli­silgen quny qansha ekendigi týraly barlyq qujattar tigilgen jazbasha es­kertý-hatty bizdiń zańgerdiń qatysýymen taǵy da tapsyrys berýshi kompanıaǵa joldadyq. Eger bul joly jaýap bolmasa, onda jergilikti sotqa júginýimizge týra keledi, – dep «Ýraldomnoremont – L» JSHS-niń dırektory Sergeı Ilıch Jerákov máseleniń mánisin túsindirdi.

Derekkóz: Aıqyn-aqparat