Almaty turǵyndary Almatydaǵy ósimdikter baǵy aýmaǵyndaǵy 2 gektar jerge qazirgi zamanǵy óner murajaıyn salýǵa qarsylyq bildirýde, - dep habarlaıdy «Qamshy» portaly 31-arnaǵa silteme jasap.

Bostandyq aýdanynda ornalasqan ósimdikter baǵynda qazirgi zamanǵy óner murajaıyn ashý týraly áńgimeniń aqparat quraldarynda taraǵanyna kóp bolǵan joq. Qalalyq ákimdiktiń bul bastamasy turǵyndardyń biraz bóligine jaqpaǵan syńaıly. Olardyń oıynsha, qurylys bastalsa qalanyń ekologıalyq ahýalyna úlken nuqsan keletin kórinedi.

«Qurylys bastalsa, odan kóterilgen shań-tozań ósimdikter baǵyn kómip tastaıtynyna 100 paıyz senimdimin. Bul qalaǵa úlken zıan ákeledi. Tipti, baqty joıyp, ornyna taǵy bir saýda ortalyǵyn salýlary da múmkin», - deıdi «Almatyny qorǵaý» qozǵalysynyń belsendisi Abaı Erekenov. 

Almatydaǵy ósimdikter baǵy álemniń ár túkpirinde ósetin ósimdikterdiń birneshe myńdaǵan túri jınaqtalǵan biregeı ǵylymı nysan. 100 gektardan asatyn baq aýmaǵy erekshe qorǵalatyn aýmaqqa jatady. Bir qyzyǵy, baqtyń aýmaǵynda jańa mýzeı ashý týraly bul bastamaǵa óner qaıratkerleriniń ózderi tań qalyp otyr. «Táńiri-Umaı» óner galereıasynyń dırektory birneshe jyldan beri qazirgi zamanǵy óner murajaıyn ashý týraly bastamalaryna jaýap qatpaǵan sheneýnikterdiń bul sheshimi kúdik týǵyzatynyn aıtqan.