Almatyda S.Asfendıarov atyndaǵy Qazaq ulttyq medısına ýnıversıtetiniń uıymdastyrýymen elimizdiń maqtanyshy, otandyq medısınanyń damýyna ózindik úles qosqan kórnekti ǵalym, akademık, Dúnıejúzilik densaýlyq saqtaý uıymynyń Leon Bernard atyndaǵy eń joǵary marapattyń, Memlekettik syılyqtyń, İ dárejeli «Dostyq» ordeniniń ıegeri, Qazaq taǵamtaný akademıasynyń prezıdenti, medısına ǵylymdarynyń doktory Tóregeldi Sharmanovtyń 85 jyldyq mereıtoıyna arnalǵan saltanatty kesh ótti. Otandyq medısına salasynyń ardagerleri, medısına salasyndaǵy halyqaralyq uıymdar ókilderi, ǵalymdar, oqytýshylar men stýdentter qatysqan keshti S.Asfendıarov atyndaǵy Qazaq ulttyq medısına ýnıversıtetiniń rektory Aıqan Aqanov júrgizip otyrdy.
Atalmysh ýnıversıtettiń 1200 oryndyq «Konkordıa» teatrynda ótken alqaly jıynnyń betashary Memleket basshysynyń mereıtoı ıesine joldaǵan quttyqtaýymen ashyldy. Elbasynyń sálemin Densaýlyq saqtaý jáne áleýmettik damý mınıstriniń orynbasary Svetlana Jaqypova jetkizdi.
«Qurmetti Tóregeldi Sharmanuly! Seksen bestiń tórine sergek qalpyńyzda kelip otyrǵan mereıjasyńyz qutty bolsyn! Siz dáriger mamany retinde úzbeı izdenýdiń, halyqqa adal da abyroıly eńbek etýdiń nátıjesinde kásibı biliktiliktiń bıik shyńyna shyǵyp, qoǵamda buljymas bedelge ıe boldyńyz. Joǵary adamgershilik qasıetterińizben, zor uıymdastyrýshylyq qabiletińizdiń arqasynda respýblıkamyzdyń densaýlyq saqtaý mınıstrligine jetekshilik jasap, osy salada aýqymdy ister tyndyryp, laıyqty qoltańbańyzdy qaldyrdyńyz. Ǵylymı izdenisterińiz de jemisti bolyp, KSRO Medısına ǵylymy akademıasynyń akademıgi atandyńyz. Álemdik densaýlyq saqtaý isin damytýǵa qosqan úlesińiz úshin Dúnıejúzilik densaýlyq saqtaý uıymynyń Leon Bernard atyndaǵy syılyǵymen marapattaldyńyz. Osy ýaqytqa deıin belsene eńbekten qol úzbeı, álemdegi eń ozyq medısına jetistikterin óz elimizde qoldanýǵa, halqymyzdyń densaýlyq saqtaý mádenıetin arttyrýǵa atsalysyp kelesiz. Sizdiń ónegeli ómirińiz ben jemisti eńbek jolyńyz jastarymyzǵa jaqsy úlgi. Osy eńbegińizdiń zeınetin uzaǵynan kóre berińiz. Zor densaýlyq, baıandy baqyt, áýletińizge amandyq pen ıgilikter tileımin», – delingen quttyqtaý hatta.
Sondaı-aq, Svetlana Jaqypova Parlament Májilisiniń Tóraǵasy Qabıbolla Jaqypovtyń, Memlekettik hatshy Gúlshara Ábdiqalyqovanyń, Densaýlyq saqtaý jáne áleýmettik damý mınıstri Tamara Dúısenovanyń da izgi tilekteri men ǵalymnyń týǵan jeri Jezqazǵannan joldaǵan jerlesteriniń ystyq sálemin jetkizdi.
Tóregeldi Sharmanuly eńbek jolyn aýyl dárigeri bolyp bastap, otandyq medısına salasynda jaýapty qyzmetter atqaryp, áli de attan túspeı jurtshylyqtyń shynaıy alǵysy men qurmetine bólenip keledi. Ol qashanda ózin kásibı maman, asqan uıymdastyrýshy, qashanda el múddesin basty mindet sanaıtyn aıtýly tulǵa retinde tanyta bildi. Ǵylym jolyndaǵy jemisti qyzmeti, halyq densaýlyǵyn nyǵaıtý men jaqsartýǵa sińirgen orasan zor eńbegi Qazaqstan medısınasy tarıhynda máńgi qalatyny sózsiz.
T.Sharmanovtyń esimi Qazaqstan medısınasymen tyǵyz baılanysty. Ásirese, onyń bilikti uıymdastyrýshy retinde 1978 jyly Almatyda 146 memleket delegasıasy qatysqan ataqty Adamzat densaýlyǵynyń HH ǵasyrdaǵy uly hartıasy atanǵan qujatty qabyldaǵan DDU-nyń halyqaralyq konferensıasyn óz dárejesinde ótkizýi, 1988 jyldan ózi negizin qalaǵan Taǵamtaný ǵylymı-zertteý ınstıtýtyn búginde halyqaralyq dárejedegi ulttyq akademıaǵa aınaldyrýy, Úkimet aldyna azyq-túlikte temir, ıodtyń jetispeýin joıý úshin undy mıkroelementtermen baıytý týraly usynystar qoıyp, sol jóninde Elbasyna arnaıy kirip, sonyń negizinde Prezıdent Úkimetke salamatty tamaqtanýdyń memlekettik saıasaty jóninde doktrına jasaýdy tapsyrýy, sondaı-aq, ǵalymnyń tek densaýlyq saqtaý salasynda emes, qoǵamdaǵy qaıratkerligi óz aldyna bir tóbe.
Bir aıta keterligi, ári keshtiń ereksheligi desek te bolady, moderator Aıqan Aqanuly baıandama ornyna mereıtoı ıesine oryssha, qazaqsha, eń sońynda aǵylshynsha saýal qoıyp, suhbat júrgize otyryp, jıyndy qyzyqtyra tústi.
Óz kezeginde mereıtoı ıesi sonaý balalyq shaǵyna, azamat bolyp er jetken taǵylymdy ómirine saıahat jasap, kórikti oıymen, ómirden túıgen pálsapasynan syr aqtaryp, erkin áńgi­me-dúken qurdy. Sonymen qatar, Tóregeldi Shar­manulynyń úzeńgiles dostary – akademık Kamal Ormantaev, burynǵy Densaýlyq saqtaý salasyn ár jyldarda basqarǵan Vasılıı Devátko, Tólebaı Raqypbekov, t.b. qyzmettes bol­ǵan árip­testeri, shákirtteri mereıtoı ıesi jaı­ly qy­zyqty estelikter, jyly lebizderin bildirdi.
Kesh barysynda aıtýly tulǵa jaıly derekti fılm, 200-ge jýyq slaıd-shoý kórsetilip, ánnen shashý shashyldy.