Mádenıet jáne sport mınıstrliginiń keńeıtilgen alqa májilisinde mınıstrlik boıynsha bıylǵy 9 aıda atqarylǵan jumystardyń nátıjeleri qorytyndylanyp, aldaǵy is-josparlar naqtylandy.
Adamzatqa  ortaq jobalar
Mádenıet jáne sport mınıstri Arystanbek Muhamedıuly «100 naqty qadam» – Ult josparyn júzege asyrýǵa negizdelgen aýqymdy jobalar, sondaı-aq, mádenıet, sport, tilderdi damytý jáne úkimettik emes uıymdarmen jumys týraly qysqasha toqtala kelip, osy aralyqta sala qyz­metkerleriniń aıtarlyqtaı tabys­tarǵa qol jetkizgenin baıandady. Mınıstrdiń málimdeýinshe, ke­le­shekte Qazaqstanda «Máde­­nıet­terdiń jaqyndasý orta­lyǵyn» qurý qolǵa alynbaq. Bul ortalyq Respýblıkalyq kitap mýzeıiniń arqaýynda boı kóteredi dep kózdelýde, sonymen qatar, onyń aldaǵy ýaqytta IýNESKO-nyń qamqorlyǵy aıasynda jumys isteýin qamtamasyz etý qarastyrylmaq. Mınıstrdiń aıtýynsha, osynaý deńgeıdegi ortalyq tek IýNESKO-nyń Bas konferensıasynyń qarary negizinde ǵana quryla alady.
Sondaı-aq, halyqaralyq áriptestikti damytý maqsatynda, sheteldik ǵalymdarmen tyǵyz baılanys ornatylýda. «Norvegıa jáne nemis ǵalymdary Qazaqstannyń Berel qorǵany men Tamǵaly petroglıfteri syndy tarıhı eskertkishterdi zertteýge jáne ony saqtaýǵa qatysty jergilikti ǵalymdardyń jobalaryna qaty­sýǵa qyzyǵýshylyq tanytýda. Qazaqstan óz kezeginde aýqymdy jobalardy sheteldik ǵalymdarmen birlesip júzege asyrýǵa múmkindik beretin mundaı áriptestik ári mádenı yntymaqtastyqtaǵy is-áreketterge qashanda tek qoldaý bildi­retindigin alǵa tartty.
Eń birinshi – eldik múdde
Naryq ekonomıkasyna sáıkes mádenıet salasynda da aıtarlyqtaı oń nátıjelerge qol jetkizilip keledi, mysaly, atap aıtar bolsaq, mýzeılerdiń, mýzeı-qoryqtardyń jumysyn belsendirý maqsatynda 2015 jyly barlyq uıymdar RMK-dan RMQK uıymdastyrý-quqyqtyq formasyna ótti. Osynyń arqasynda mýzeılerge jańasha kózqaras qalyptasýda. Olardyń ózderi tabys tabýǵa múmkindik ashyldy. Mundaı sheshimniń tıimdi úlgisi elordadaǵy jańadan boı kótergen Ulttyq mýzeı bolyp tabylady. Ol aqpan-shilde aılarynda 65 mln. teńge tabys tapqan.
Demeýshilik pen mesenattyqtyń damýy úlken áleýetke ıe desek, Qazaq handyǵynyń 550 jyldyǵyn toılaý úshin respýblıkalyq búdjetten qarjylandyrýmen qatar, demeýshilerdiń qarjylaı qoldaý kórsetýi arqasynda eldik toı shyn mánindegi halyqtyq merekege aınaldy. Elordada Mem­leket basshysynyń qaty­sýy­men saltanatty jıyn jáne teatr­landyrylǵan qoıylym uıym­dastyryldy. Mereıtoı Taraz qalasynda jalǵasyn tapty. Onda Qazaq handyǵynyń 550 jyldyǵy monýmenti jáne «Kóne Taraz» mýzeıi, sondaı-aq, «Uly Jibek joly» etnofestıvali saltanatty jaǵdaıda ashyldy.
 Stýdıa ashylyp, uıym qurylady
Mınıstr óz sózinde, sonymen qatar, «Qazaqfılm» AQ-tyń áleýetin biriktirý úshin ınvestısıalar tartý boıynsha jáne 50/50 ortalyq qarjylandyrý qaǵıdaty boıynsha jeke kompanıalardy, onyń ishinde sheteldik kompanıalardy tartý baǵytynda jumystar júrgizilip jatqanyn jetkizdi. Ulttyq fılmderdi óndirý qazirgi zamannyń jarqyn jáne úzdik úlgilerin, baı tarıhymyzdy, mádenıetimiz ben muramyzdy tanytatyn kórnekti tulǵalardyń beınesin naqtyly túrde kórsetýge baǵyttalǵan. Osyǵan oraı aldaǵy ýaqytta ulttyq anımasıalyq stýdıa men dokýmentalıstıka stýdıasyn qurý mańyzdy baǵyt bolyp otyrǵanyn tilge tıek etti.
Munyń qatarynda, sonymen birge, elimizde «Qazaqstan» orta­lyq konsert zalynyń arqaýynda «Qazaqkonsert» memlekettik konserttik uıymyn qurý usy­ny­lyp otyrǵanyn baıandaǵan A.Muha­medıuly: «Bul elordamyz­da oryn­daýshylardyń joǵary kásibı pýlyn qalyptastyrýǵa múmkindik beredi», – dep túıindedi sózin.
 Sport jáne ­dene shynyqtyrý
Qazaqstan sportshylary aıtýly saıys­tardan qurqol qaıtqan emes. Olar bıyl da ózderin óte joǵary deńgeıde kórsete aldy. Sonyń biri – «Astana» fýtbol klýbynyń tabystary deý lázim. «Bıyl premer-lıganyń «Astana» komandasy Qazaqstan tarıhynda alǵash ret Chempıondar lıgasynyń toptyq kezeńine óte aldy. Qazaqstan tórinde tuńǵysh ret ótkizilgen dzúdodan álem birinshiliginde otandyq qurama 1 altyn, 1 kúmis enshilep, jalpy esepte 4-oryndy ıelendi. Taılandta ótken Azıa chempıonatynda birinshi oryn alǵan Qazaqstannyń boks quramasy da bizdi qýantty. Aýyr atletıkadan Azıa chempıonatynda Qazaqstan ziltemirshileri 3 altyn, 2 kúmis jeńip aldy», –dedi mınıstr.
Aldaǵy XXVIII Qysqy Búkilálemdik ýnıversıada qarsańynda qysqy sport túrleri boıynsha sporttyq rezervti daıyndaý, qysqy sport túrleri boıynsha jastarǵa arnalǵan sport mektepteri men bólimsheleri jelisin odan ári damytý máselesine kóp kóńil bólinýde. «Ýnıversıada-2017» sharasyna arnaıy eki muz aıdyny arenalary salynýda: Alataý aýdanynda boı kóteretin 12 myń oryndyq jáne Medeý aýdanynda oryn tebetin 3 myń oryndyq muz arenalary buqaralyq sportty damytýǵa degen qamqorlyqtyń naqty kórsetkishi bolyp tabylady. Eske sala keteıik, Búkilálemdik Ýnıversıada 2017 jylǵy 28 qańtar men 8 aqpan aralyǵynda Almaty qalasynda ótkiziledi dep kútilýde.
«Búgingi tańda Rıo-de-Janeıroda ótetin 2016 jylǵy XXXI Jazǵy Olımpıa oıyndarynda bizdiń sportshylarymyzdyń sátti óner kórsetýi men sapaly daıyndalýyna qatysty jumystar júrgizilýde. Qazirgi ýaqytta sportshylar boks, jeńil atletıka, júzý, baıdarkada jáne kanoeda eskek esý jáne taǵy da basqa sporttyń 8 túri boıynsha, Olımpıadanyń 26 joldamasyn utyp aldy», – dedi alqa májilisindegi sózinde A.Muhamedıuly.
Ortaq oılar – oń ıdeıalar
Alqa májilisinde munan da basqa birqatar ózekti máseleler áńgimege arqaý etildi. Mádenıet jáne sport vıse-mınıstri Ǵalym Ahmedıarov «Mádenıet jáne tarıhı-mádenı mura máseleleri boıynsha birqatar zań aktilerine ózgerister men tolyqtyrýlar engizý týraly» zań jobasy, vıse-mınıstr Marat Ázilhanov Tilderdi damytý jáne úkimettik emes uıymdarmen jumys, Qazaq ulttyq óner ýnıversıtetiniń rektory Aıman Musaqojaeva bilim oshaǵynyń jetistikteri men keleshegi, Sport jáne dene shynyqtyrý isteri komıtetiniń tóraǵasy Elsıar Qanaǵatov ulttyq sport túrlerin damytý máseleleri, Din isteri komıtetiniń tóraǵasy Ǵalym Shoıkın dinniń qazirgi ahýaly, respýblıkalyq koreı mýzykalyq komedıa teatrynyń dırektory Lúbov Nı teatr ujymdarynyń qazirgi hal-jaıy týraly oılarymen bólisti.
Sala qyzmetkerleriniń málimdeýlerine qaraǵanda, toǵyz aıda tolymdy ister atqarylypty. Biraq qol jetken tabysqa toqmeıilsý baıqalmaıdy. Ortaǵa salynǵan lebizderden «alda tosyp turǵan ister munan da tolaıym» degen oı basym túsip jatty.
Alqa májilisine Prezıdent Ákimshiligi İshki saıasat bóliminiń meńgerýshisi Aıda Balaeva qatysty.