Búgin Memleket basshysy Nursultan Nazarbaev Aqordada AQSH-tyń memlekettik hatshysy Djon Kerrıdi qabyldady. Bul týraly «Qamshy» portaly Aqordaǵa silteme jasap habarlaıdy.
Aıta keteıik, bul Djon Kerrıdiń Qazaqstanǵa alǵashqy sapary. "Taıaýda men Nú-Iorkte AQSH Prezıdenti Barak Obamamen kezdestim, ekijaqty yqpaldastyq máseleleri jóninde sóılestik. Bizdiń respýblıkamyz jeltoqsanda 24 jyldyǵy toılanatyn táýelsizdiginiń alǵashqy kúnderinen beri Sizdiń elmen yntymaqtasyp keledi, egemendigimiz ben ekonomıkamyzdyń damýyna udaıy kórsetilip kele jatqan qoldaý úshin Qazaqstan halqy rıza. Búginde elimizde amerıkalyq kapıtaldyń qatysýymen 500-ge jýyq kompanıa jumys isteıdi. Biz osy jumysty jalǵastyrýǵa nıettimiz", - dedi Memleket basshysy.
Nursultan Nazarbaev Qazaqstan men AQSH ıadrolyq qarýsyzdaný jáne taratpaý máselesi boıynsha da yntymaqtasyp otyrǵanyn aıtty. Osyǵan baılanysty Barak Obamanyń bul baǵyttaǵy bastamalaryna Memleket basshysy qoldaý bildirdi. Nursultan Nazarbaev pen Barak Obamanyń Nú-Iorkte ótken ıadrolyq qarýdy taratpaý, qarýly ekstremızmge qarsy is-qımyl, Aýǵanstandaǵy jaǵdaı jáne DAISH toptaryna qarsy kúres máseleleri talqylanǵan kelissózderiniń qorytyndysyn AQSH Memlekettik hatshysy joǵary baǵalaıtynyn atap ótti. Sonymen qatar, Djon Kerrı Qazaqstan men AQSH-tyń tyǵyz seriktestigi Bes ınstıtýsıonaldyq reforma men "100 naqty qadam" Ult josparyn júzege asyrý isine eleýli yqpal etetinine senim bildirdi.
"AQSH rasynda da Qazaqstandaǵy iri ınvestorlardyń biri bolyp sanalady. Búgin men Amerıka saýda palatasynyń Qazaqstandaǵy ókilderimen kezdestim. Olar ózderiniń Sizdiń elde qol jetkizgen tabysyna qanaǵattanatyndaryn bildirdi", - dedi AQSH Memlekettik hatshysy.
