Qaraǵandy oblystyq sotynda S. Ahmetov jáne basqa laýazymdy sheneýnikterdiń qylmystyq isi boıynsha kýágerlerden jaýap alý jalǵasyp jatyr. 11 qarashadaǵy sot otyrysynda «Topar jylyjaılary» JSHS-ne qatysty epızodty qaraý kezinde kýáger Galına Kordovıch sotqa jaýap berdi. Aıta keterligi, buǵan deıingi sot otyrysynda túsinik bergen kýágerlerden «Topar jylyjaılary» jobasyndaǵy qondyrǵynyń quny 3 mln. eýroǵa ádeıi kóterilgeni málim bolǵan.
«KazInterAktıv 21 vek» jáne «Gold company KZ» fırmalarynyń esepshisi Galına Kordovıch sotta aqshany qolma-qol túrine qalaı aınaldyrǵany týraly áńgimeledi. «2012 jyldyń jeltoqsanynda «Forte banktiń» qaraǵandylyq fılıalynda Erlan Qısyqovpen tanystym. Ol aqshany qolma-qol túrine aınaldyrý qyzmetine qyzyǵýshylyq tanytty. E. Qısyqov «ıspandyq «Rupefa Technoagro S.L.» kompanıasy aýdaratyn aqshany eshqandaı is júzindegi taýar jetkizý men qyzmet kórsetýsiz «Topar jylyjaılary» JSHS-niń shotyna aýdaryp, qalǵanyn qolma-qol aqsha túrinde maǵan qaıtarý kerek» degen talap qoıdy» dep habarlady kýáger.
«QazAgroQarjy» AQ-nyń sol kezdegi nesıeleý jáne lızıń departamentiniń dırektory E. Qısyqov kóp uzamaı G. Kordovıchke aqshany qolma-qol túrine aınaldyrýǵa ótinish jasaıdy. Odan áride «TorgPromStroı», «KazInterAktıv 21 vek», «Gold company KZ» kompanıalary arqyly ıspandyq fırmadan jáne «Topar jylyjaılarynan» túsken qarajat qolma-qol aqshaǵa aınaldyrylǵan. «İs júzinde biz eshqandaı qyzmet túrin kórsetken joqpyz, taýarlar jetkizilgen joq. Qolma-qol aqshany men E. Qısyqovqa berdim»,- dep túsindirdi kýáger istiń mán-jaıyn.
Sondaı-aq, ol aqsha aýdarymdaryn tirkeý úshin ıspandyq «Rupefa Technoagro S.L.» kompanıasynyń ókili Kámıla Pirálıevamen baılanys ornatqany týraly da aıtty. «Men ony tanymaımyn. Elektrondyq poshtasynyń meken-jaıyn E. Qısyqov berdi. K. Pirálıeva elektrondyq poshtama kelisim-sharttardy jiberdi. Men oǵan ınvoıstardy, shot-faktýralardy saldym. Biz qashan jáne qaı ýaqytta aqsha aýdarylatyny jóninde elektrondyq poshta arqyly hat jazystyq» dep áńgimeledi G. Kordovıch.
Sotqa deıingi tergeýde bergen jaýabynda kýáger 2013 jyly 31 qańtarda «Topar jylyjaılary» JSHS-nen atalǵan kásiporyndardyń shotyna jalpy somasy 101 368 500 teńge jáne 2013 jyly 31 shildede 50 000 000 teńge túskenin, keıinirek ol qarajat basqa kompanıalar arqyly qolma-qol aqshaǵa aýystyrylyp, «Topar jylyjaılaryna» qaıta jiberilgenin aıtqan. 2013 jyldyń 13 maýsymy men 19 jeltoqsany aralyǵynda «Rupefa Technoagro S.L.»-dan «KazInterAktıv 21 vek» JSHS-niń shotyna 1 199 741,35 eýro aýdarylǵan. Ony jalǵan fırmanyń nomınaldy dırektory D. Safonov qolma-qol aqshaǵa aınaldyryp, E. Qısyqovqa bergen. Odan áride «TorgPromStroı»-dyń shotyna ıspandyq kompanıadan 262 589 eýro túsip, G. Kordovıch sonyń 4 835 000 teńgesin qolma-qol aqsha túrinde E. Qısyqovqa jetkizgen. Qalǵan aqshalar da basqa kompanıalar arqyly shottan alynyp, qolma-qol túrinde E. Qısyqovqa berilgen.
Ámına BÁKİR.
