«Ahmetov isi» boıynsha 11 qarashadaǵy sot otyrysynda «Topar jylyjaılary» jylyjaı kesheniniń qurylysyn salý kezinde búdjet qarajatyn urlaý epızodyn qaraý barysynda sottalýshylarǵa «QazAgroQarjy» AQ-nyń basqarýshy dırektory Baýyrjan Bıshenovtyń atynan azamattyq shaǵym tústi. Kompanıa ózine zıan keltirgeni úshin sottalýshylardan 1 mlrd. 104 mln. 388 myń 755 teńge óndirip alýdy surapty.
Aıta ketelik, sotta laýazymdy sheneýnikterdiń qylmystyq isi boıynsha «Topar jylyjaılaryna» qatysty jetinshi epızodty qaraý kezinde Qaraǵandydaǵy jylyjaı kesheniniń qurylysyn júrgizýde birqatar zań buzýshylyqtarǵa jol berilip, jobanyń quny ádeıi kóterilgeni málim bolǵan. 4 qarashadaǵy sot otyrysynda túsinik bergen «Topar jylyjaılary» JSHS-niń dırektory Aleksandr Zabırov jylyjaı keshenin jetildirýge «QazAgroQarjy» AQ-y nesıe aqsha bólgenin habarlady.
A. Zabırov jylyjaı keshenine qajetti qondyrǵyny jetkizip berýge ıspandyq «Rupefa Technoagro S.L.» kompanıasymen mámile jasaıdy. Kýágerdiń aıtýynsha, kóp uzamaı ol S. Ahmetovtiń adamdarynan jetkizýshige qondyrǵynyń qunyn 3 mln. eýroǵa asyryp kórsetý jáne aıyrmadaǵy aqshany Qazaqstanǵa qaıtarý týraly nusqaý alady. «Rupefa Technoagro S.L.»-nyń basshylyǵy bul usynysqa kelisken soń 3 mln eýro qazaqstandyq jalǵan kásiporyndardyń shotyna aýdarylyp, qolma-qol aqsha túrine aýystyrylady. Onyń bir bóligi eks-premerdiń «senimdi ókili», sol kezde «QazAgroQarjy» AQ-nyń basqarma tóraǵasy bolǵan Ǵumar Raqymjanov arqyly S. Ahmetovke berilgen, qalǵan bóligi jylyjaı kesheniniń qurylysyna salynady.
Baýyrjan Bıshenov sot otyrysynda «Topar jylyjaılary» JSHS-niń 8 gektar jerge jylyjaı keshenin salý jobasyn qarjylandyrý týraly ótinishi «QazAgroQarjy» AQ-na 2012 jyly kelip túskenin habarlady. «Nesıe komıteti oń sheshim shyǵardy. Osy sheshimdi qoǵamdyq komısıa da maquldady. Jylyjaıdyń eski ǵımaraty men sıyr qoralar múlik retinde kepilge qoıyldy» dep túsindirdi jábirlenýshi taraptyń ókili. Onyń aıtýynsha, qazirgi kezde joba kúrdeli kúıinde qalyp, tolyq qýatymen iske qosylmaǵan. Osyǵan oraı bereshek aqsha kóbeıgen. Merzimi ótken mindettemelerdiń somasy 344 mln. 314 myń 296 teńgege jetipti. «Osydan kelip azamattyq shaǵym jazyp, kináli adamdardy qylmystyq jaýapkershlikke tartý týraly sheshim qabyldandy. Shaǵymda aınalymdyq aqshalardy toltyrýǵa arnalǵan eki kelisim-shart bar. Onyń bireýi qurylys-montaj jumystaryna qatysty. Qondyrǵynyń quny asyra kórsetilgeni jazylǵan. Biz basynda jobaǵa engizgen qondyrǵynyń quny qazirgimen sáıkes kelmeıdi»,- dedi B. Bıshenov. Ol jylyjaı kesheniniń qurylysyn aıaqtaýǵa ınvestorlar izdep jatqanyn, ázirshe ony satyp alýǵa tilek bildirgenderdiń joqtyǵyn aıtty.
Ámına BÁKİR.
