Jeltoqsannyń jetinshi juldyzynda 31 arnada qazaq handyǵynyń 550-jyldyǵyna arnalǵan jańa tarıhı-fantastıkalyq telehıkaıanyń tusaýkeseri ótedi. Ótken ǵasyrdyń keıipkerleri, sol kezdegi turmys-tirshilikti kórsetetin dekorasıalar men  rekvızıtter, sol zamanǵa saı kıim úlgilerin kıgen keıipkerler jáne qazaq jeriniń keń baıtaq dalasy!

Telehıkaıanyń sújeti – qazirgi zamanda ómir súrip jatqan, birneshe qazaqstandyqtardyń, burynǵy Qazaq Handyǵynyń tusyna ótip ketkenderi jaıly baıandaıdy. Hıkaıanyń basty keıipkeri: Talas Serkebaev - belgili fızık, fızıka-matematıka ǵylymynyń doktory, ýaqyt portalyn júzege asyrý úshin birneshe jyldan beri zertteýlermen aınalysyp keledi. Arnaıy apparattyń kómegimen zertteý jumystaryn júrgizip jatqan Talasqa, jańa beınebaıan túsiremiz dep adasyp kelgen Aıdana esimdi tanymal ánshiniń toby, Talastyń jumysyna kedergi keltirip, barlyq keıipkerler kenetten burynǵy zamanǵa ótip ketedi…

 Serıaldyń basty maqtanyshy: tanymal, kásipqoı akterler. Týyndynyń juldyzy - belgili qazaqstandyq ánshi Kámshat Joldybaevanyń týǵan sińilisi – Altynaı Joldybaeva, teatr jáne kıno akterleri Áset Imanǵalıev, Baýyrjan Surapbaev, Baný Mankeeva, Zeınábil Jomart syndy talantty óner ıeleri óz keıipkerlerin jaqsy somdap shyqty.

Óz ómirlerine úırenip qalǵan keıipkerlerimiz Qazaq Handyǵyna ótip ketken soń, ol jerden tiri qalyp, qashyp shyǵa alady ma? Ádemi áýen men ázilge toly hıkaıa, eshkimdi beı-jaı qaldyrmaıdy.

7-shi jeltoqsannan bastap saǵat 23.00 «31 arnada»