Joq!

Jaqsyny jorýym úshin,

Qıalǵa qonyp turdyń ba?

Baqytty bolýym úshin,

Men seni jolyqtyrdym ba?

Joq!

Qalmaıtyn shoqtyń kúlindeı,

Jaı ǵana jastyq óleń be?

Ózeýrep kóptiń birindeı,

Men seni jaqsy kórem be?

Joq!

Men úshin jaralypty dep,

Ádeıi taıap keldim be?

Taǵdyrǵa talanypty dep,

Men seni aıap keldim be?

Joq!

Bilemin tym batyl isim,

Syrtyńnan tabaladym ba?

Tek syrtqy symbatyń úshin,

Men seni baǵaladym ba?

Joq!

Sendegi muńlyq keýdege,

Oryn ap sıa alamyn ba?

Ótirik umyttym deýge,

Men seni qıa alamyn ba?

Joq!

Tunyp tur kesede bulaq,

Mólt eter janarymyn ba?

Jaqutsyń  dese de, biraq,

Men sensiz baǵalymyn ba?

Joq!

Keter dep qoryqqansha átteń,

Ózińnen úmittendim be?

Senimen jolyqqan sátten,

Men sensiz kúlip kórdim be?

Joq!

Qasyńa barady qaısy,

Bolashaq jarmyn ba osy?

Joq!

Ne degen qarama qaıshy,

Men sensiz barmyn ba osy?

Joq!

Jumataı  júrek

Óleńimmen qyldym ba taǵy mezi?

Uıqysyz otyramyn sorlap tańda.

Jumataıdyń júregin  Táńir ózi,

Julyp alyp keýdeme ornatqan ba?

Tózimimdi taýysyp, urlasyn da,

Úmitti júrgenim aı  úzbeı nesi?

Kim biledi men shyǵar bul ǵasyrda,

Jumataıdyń búgingi qyz beınesi!

Júregimdi tyńdashy, sózimdi emes,

Ar jolynda demeımin sirá, taıdym.

Ótirik kúlip júrgen ózimdi emes,

Aıap ketem júregin  Jumataıdyń!

Úmit kútip qaharly qabaǵyńnan,

Dúrsildeıdi júregim almaı tynym.

Men ólgende bilemin janaryńnan,

Úzilip bir tamshy da tambaıtynyn.

Jalynaıyn nesine  naz uq  dep men,

Jubatarsyń mensiz de  jat kóńildi.

Júregimniń  jasymen  jazyp ketken,

Shań basyp qalmasa eken dápterimdi...

Sen biraq. . .

Ózińsiz kúnim - kún emes,
Janymnyń jaryq bólmesi.
Saǵan qarasa, túk emes,
Sen biraq, qaraı kórmeshi!

Jyrymnan bilte esip em,
Júzimnen turdy nur atyp.
Seni unatsa, keshirem,
Qalmashy biraq, unatyp.

Arýdyń kórip hanshasyn,
Baqyttan bal-bul kúlmeshi.
Seni ańsasa, ańsasyn,
Sen biraq, ańsap júrmeshi!

Jaryǵym bilem,jalynsyń,
Baǵalaıtynym, barym da.
Seni saǵynsa, saǵynsyn,
Sen biraq, janym,saǵynba!

Sezimdi mendik joq tonar,
Ketse de tipti jer qulap.
Seni súıetin - kóp bolar,
Súıip qalmashy, sen biraq. . .

Men seni joǵaltqan kúni...

Men seni joǵaltqan kúni,

Aınala túnekke batyp,

Qabaqty shytyp alam.

Óksigim júrekte qatyp,

Tilimdi jutyp alam.

Men seni kórmegen kezde,

Jek kórem bes kúnińdi de.

Eshkimge qaramaı da.

Kórmeımin eshkimińdi de,

Bar, joǵyn sanamaı da.

Men meni jyrlamaı qalsam,

Ókpelep óleńge daǵy,

Qalamdy  laqtyramyn.

Qurdym bop óner de, bári,

Ózimdi jat qylamyn.

Men seni kútpeı qalǵanda,

Sen kelgen joldardyń bárin,

Qoparam qoldarymmen.

Otaımyn ormannyń bárin,

Obal aq  bolǵanymen.

Men seni joǵaltqan kúni,

Ótirik jubatatyndar,

Úmitti úz demesin.

Bolsa da, suratatyndar,

Eshkim de izdemesin.

Men seni joǵaltqan kúni,

Men de joǵalam!

Jaraıdy!

Ymsyz bileıin,
Muńsyz kúleıin,
Únsiz júreıin,
Jaraıdy!

İzdemeıin be?
Biz demeıin be?
Kúzge ereıin de. . .
Jaraıdy!

Jyrlamaıyn ba?
Qur qalaıyn ba?
Urlamaıyn da. . .
Jaraıdy!

Saǵynbaıyn ba?
Sabylmaıyn ba?
Baǵyń daıyn ba. . .
Jaraıdy!

Unamaıyn ba?
Suramaıyn ba?
Jylamaıyn da...
Jaraıdy!

Osy deıin be?
Óshireıin be?
Keshireıin be. . .
Jaraıdy!

Ózińnen!

Kúnim deseń de,
Gúlim deseń de,
Kúlimdesem de,
Ózińnen!

Joq teńeýiń de,
Ókpeleýim de,
Kóktemeýim de,
Ózińnen!

Baǵyń qylsań da,
Tabyndyrsań da,
Saǵym qylsań da,
Ózińnen!

Aı qylam deseń,
Qaıǵyram deseń,
Taıdyram deseń,
Ózińnen!

Tos deıtiniń de,
Óshpeıtinim de,
Qosh deıtinim de,
Ózińnen!

Ómir - óleń!

Aqyn deıtin qyp qysqa saparymda,
Kerek emes mansap ta, ataǵyń da.
Óleńim jubatsa eken jabyqqandy,
Bolmasam da úzdikter qatarynda.

Berse ǵoı sanalarǵa sózim kórik,
Ashynǵan-sabyr etse,tózim bolyp.
Óleńimniń ishinen adasqandar,
Óksip óksip alsa ǵoı ózin kórip.

Ómir synap qulatsa shaıqap, aldap,
Ótkendi eshkim sirá qaıtara almaq.
Óleńimmen mańdaıdan óbeıinshi,
Úzilgen úmitterdi qaıta jalǵap.

Kóńilimde shúberek túıýli óleń,
Júrgen kóp qapalanyp, kúıýmenen.
Jaraly júrekterdi jibitsem ǵoı,
Emdep berip qaıtadan súıýmenen!

Qabyrǵa joq qaıyssa, sógilmeıtin,
Pende joq kezi kelse, kómilmeıtin.
Júregi bar máńgilik " Óleń " degen,
Aldanysh álem ǵana -Ómir deıtin!

Sezbeıtin shyǵarsyń!

Sezimge qarsy baryp,
Jyndana bastasam da.
Keýdemdi arshyp alyp,
Aldyńa tastasam da.

Mendegi bar daýyspen,
Aıǵaılap ah ursam da.
Ýdy da arnap ishken,
Óksikke matyrsam da.

Men endi kúlip emes,
Zar qaǵyp jylasam da.
Bilgim kep, bilip emes,
Syryńdy surasam da.

Kóńildi buryp turyp,
Ádeıi bas tartsam da.
Qýanyp, kúlip turyp,
Sen úshin jas tapsam da.

Sen ósip, kóktesin dep,
Jyrymdy kómsem daǵy.
Sen azap shekpesin dep.
Qaıǵyryp ólsem daǵy. . .

Sezbeıtin shyǵarsyń!

Keıde, sen bolǵym keledi!

Keıde, sen bolǵym keledi!
Kórgendi esinen tandyratyn,
Joqty da qalasa, bar qylatyn.
Túnderde ózine serik qylyp,
" Jalǵyzdyq " degendi jar qylatyn.

Keıde , sen bolǵym keledi!
Aqynnyń jyryna sebep bolǵan,
Júrekke sezim bop kenet qonǵan.
Dál saǵan eshbir jan kerek emes,
Sen biraq bárine kerek bolǵan!

Keıde, sen bolǵym keledi!
Kúlkisin jasyryp, tumshalaǵan,
Júrekte án salǵan muń shaǵalań.
Jazsam da jyr qylyp taýsylmaıtyn,
Sıar ma keýdeńe munsha ǵalam? !

Keıde, sen bolǵym keledi!
Erek bop turatyn qalypty elden,
Jigerin janyshtap, janyp kelgen.
Aq, adal júregin sýyryp ap,
Qanshama jandarǵa jaryq bergen!

Sen bolǵym keledi!

Men eshkimdi...

Jolyǵar dep baǵym qaı kún?
Muńǵa batyp, salynbaımyn.
Meni eshkim saǵynbasyn,
Men eshkimdi saǵynbaımyn.

Monshaqty muń tizbeleımin,
Sen úmitti úzbe meıliń.
Meni eshkim izdemesin,
Men eshkimdi izdemeımin.

Bireýge jas, qarshadaımyn,
Keýdem kúısin, jansa qaıǵym.
Meni eshkim ańsamasyn,
Men eshkimdi ańsamaımyn.

Birde qalyp, ozdym keı kún,
Azapqa da tózdim deımin.
Meni eshkim kózge ilmesin,
Men eshkimdi kózge ilmeımin.

Tabam demeı saıa qaı kún,
Jalǵyz júrek, aıadaı muń.
Meni eshkim aıamasyn,
Men eshkimdi aıamaımyn.

Bolsa da aqqý tolǵan aıdyn,
Men baǵymnan, sor qalaımyn.
Meni eshkim qorǵamasyn,
Men eshkimdi qorǵamaımyn.

Kúletinder, kúlsin meıliń,
Renjimeımin, kúrsinbeımin.
Meni eshkim shyn súımesin,
Men de eshkimdi shyn súımeımin!

Men saǵan qosylmaımyn!

Men arnaǵan jattalar jyr esińde,
Sendeı tipti ǵalamda joq eken esh.
Men qalasam, ózińdi bilesiń be?
Taǵdyr da bóget emes!

Sen dep qana boıyma tarap qanym,
Tógilse de sen barda nur tasadan.
Ózektegi ókinish paraqtaryn,
Qalasam, jyrta salam!

Júregimniń únine qulaq sap kep,
Tyńdasań, tátti muńǵa qandyramyn.
Men qalasam, shynymen bir aq sát tek,
Esińnen tandyramyn!

Abaısyz súıip qalyp, balasań da,
Baǵyńa, keshir janym osyndaımyn.
Ómirimde tek sony qalasam da,
Men saǵan qosylmaımyn!

Ádeıi!

Bıiktikke jetsem de, jetpesem de,

Baıaý bolsa, bosynshy ushqanym da.

Ádeıi baqytty bop ketpesem be!

Ómirdi súıetindeı dushpanym da.

Kórsem de keshe sirá,tapshy neden,

Soǵylǵany jetedi tekke mańdaı.

Ádeıi barlyǵyn da jaqsy kórem,

Eshbiri de qalady jek kóre almaı.

Pyshaǵy sýyrylmaı qynap qaldy,

Unap ketem baıqamaı, unatpasań.

Qasaqana meni kep jylatqandy,

Ádeıi qýyp júrip jubatpasam.

Ashpaǵandar arnaıy esikti ashpaq,

Sálemdeser ornynan turyp qana.

Ótiriktiń quıryǵyn kesip tastap,

Ádeıi baýyzdaımyn kúlip qana.

Qapalanam oılasam, men nesine?

Qaıǵyny da jeńemiz biz kúlip myń.

Óleńmen adamzattyń keýdesinde,

Aq týyn jelbiretem izgiliktiń!

Mergúl Asylhanova