Búgin «Beıneý-Bozoı» ýchaskesinde «Beıneý-Bozoı-SHymkent» (BBSH) magıstraldyq gaz qubyryn (MGQ) paıdalanýǵa berý resmı  rásimi ótti, - dep habarlaıdy «Qamshy» portaly QazAqparatqa silteme jasap. 

«BBSH» MGQ qurylysy Qazaqstan Respýblıkasyn údemeli  ındýstrıalyq-ınnovasıalyq damytý jónindegi memlekettik baǵdarlamaǵa kiredi. Osy jobanyń arqasynda respýblıkanyń ońtústigin batystaǵy ken oryndarynan otandyq tabıǵı gazben turaqty qamtamasyz etý múmkindigi týdy.

«Beıneý-Bozoı» ýchaskesin - gaz qubyryn paıdalanýǵa berý óziniń mańyzdylyǵyna qaraı tarıhı oqıǵa bolyp tabylady, ol elimizdiń barlyq magıstraldyq gaz qubyrlaryn biryńǵaı gaz tasymaldaý júıesine qosty. Bul Qazaqstannyń aýmaǵy arqyly kez kelgen baǵytta gaz tasymaldaýdy ártaraptandyrýǵa jáne ımporttyq gazǵa degen táýeldilikti tolyǵymen joıýǵa múmkindik berdi. Osylaısha, QazTransGaz tranzıttik áleýetti arttyrý jáne energıa resýrstaryn tasymaldaý boıynsha Memleket basshysy alǵa qoıǵan mindetterdi iske asyrýdy jalǵastyrady, - dep atap ótti «QazTransGaz» AQ basqarma tóraǵasy Qaırat Sháripbaev.

Osy jobany aıaqtaý 2016 jyldyń sáýir aıyna josparlanǵan bolatyn, alaıda gaz qubyry 5 aı buryn - jylytý maýsymynyń bastalýyna qaraı paıdalanýǵa engizildi. Budan basqa, tıimdi menedjment pen ınovasıalyq basqarý nátıjesinde «QazTransGaz» AQ atalǵan ýchaskeni salý barysynda bastapqy josparlanǵan somadan shamamen 150 mlrd. teńge (500 mıllıon AQSH dollary) únemdedi. Álemdik ekonomıkadaǵy turaqsyz ahýal jáne qarjylandyrý kózderiniń shektelýi jaǵdaıynda dál osyndaı únemdi tásilder ınfraqurylymdyq jobalardy damytýdy jalǵastyrýǵa múmkindik beredi.

Sonymen qatar magıstraldyq gaz qubyrynyń arqasynda respýblıka halqynyń teń jartysy turatyn ońtústik oblystardaǵy 577 eldi mekenge qosymsha gaz beriletin bolady.

Eske sala keteıik, jobany iske asyrý 2010 jylǵy jeltoqsanda bastalǵan bolatyn, qazaqstandyq «QazTransGaz» jáne  qytaılyq «Trans-Asia Gas Pipeline Company Limited» kompanıalarynyń teń úlestik negizinde «Beıneý - Shymkent» gaz qubyry» JSHS quryldy. Gaz qubyryn paıdalanýǵa engizý Qazaqstan Respýblıkasynyń barlyq magıstraldyq gaz qubyrlaryn: «Soıýz», «Orta Azıa - Ortalyq», «Buhara - Oral», «Buhara gazdy aýdany  - Tashkent - Bishkek - Almaty», «Gazlı - Shymkent», «Qazaqstan - Qytaı» biryńǵaı gaz tasymaldaý júıesine biriktirýge múmkindik beredi.