Saqtandyrýshylar 2014 jyldyń qańtarynan bastap búginge deıingi jol-kólik oqıǵalaryna saraptama júrgizip, jol apattaryna kináli bolatyn adamdardyń jasy men jol-kólik oqıǵalaryna jıi tap bolatyn kólik markalaryn anyqtady, - dep habarlaıdy «Qamshy» portaly Tengrinews.kz-ke silteme jasap.
Zertteý nátıjelerine sáıkes, jol apatyna kináli adamdardyń 24,6 paıyzy shyqanyna 5-7 jyl bolǵan avtokólikti tizgindegen. 15 paıyzy - 1993-1998 jylǵy avtokólikter. 2014 jyldyń qańtarynan beri jol apatyna Toyota markasynyń Camry, Corrolla, Prado, Land Cruiser modelderiniń ıeleri jıi túsken. Japondardyń bul brendiniń úlesinde barlyq oqıǵanyń 19,6 paıyzy bar. Ekinshi orynda "VAZ" markasy tur - 12,4 paıyz. Odan keıingi oryndarda Audi, Mazda, Mitsubishi. Eń sońǵy orynda - Mercedes. Nemis markasynyń úlesinde jol apattarynyń 8 paıyzy bar.
Sonymen qatar, zertteý nátıjelerine sensek, jol apattarynyń 59 paıyzy er adamdardyń kinásinen bolady, al 41 paıyzy - áıelderdiń, alaıda elimizde júrgizýshi áıelderge qaraǵanda er adamdar kóp. Jol-kólik oqıǵalarynyń 33 paıyzynda 24-33 jas aralyǵyndaǵy er adamdar kináli bolady.
Sarapshylardyń tujyrymdaýynsha, bul jastaǵy adamdarda kólik júrgizý tájirıbesi asa kóp bolmaıdy jáne olar jol qozǵalysy erejesin buzyp, ózderine jolda "ushyp júrýge" erik beredi. Sonymen qatar, bul toptaǵy adamdardyń kinásinen bolǵan jol apattaryndaǵy shyǵynnyń kólemi ortasha tólemnen asyp túsedi.
Jol apatyna sebepker bolatyndardyń ekinshi ornynda 44-53 jas aralyǵyndaǵy júrgizýshiler tur, olardyń úlesi 21 paıyzǵa teń. 16 paıyzy - 24 jasqa deıingiler, 11 paıyzy - 34-43 jas aralyǵyndaǵylar, 7 paıyzy - 51-63 jastaǵylar.
