Ótken aptada Almaty avtobýstaryna ornatylyp jatqan «Ońaı» elektrondyq júıesiniń qurylǵylary qazaqsha «sóıleıtin» boldy dep aqparat quraldary jarysa jazdy. Osyǵan jaýapty mekeme basshylary elektrondy bılettendirýge arnalǵan qurylǵylardaǵy «Jolaqysyn tóleý úshin kartany qoıyńyz» jáne «Karta týraly aqparat» degen aqparattardyń qazaqshalanǵanyn jerden jeti qoıan tapqandaı jarıalady.

Jaǵymdy jańalyqty estigenimizge mine, bir apta ýaqyt ótti. Alaıda, sol «jańalyqty» kózben kóre almaı kelemiz. Ózim kún saıyn Tóle bı dańǵyly boıymen júretin óoǵamdyq kólikterge jıi otyramyn. Naqty aıtar bolsam, 16, 126-baǵyttaǵy avtobýstardyń turaqty jolaýshysymyn. Sabaqqa shyqqanda, oqýdan qaıtqanda kartam bolmasa da «Ońaı» qurylǵysyna bir kóz salamyn. Sol qalpy. «Prılojıte kartý» men «Informasıa o karte» degen orys tilindegi málimetterden basqa túk joq.

«Barmaq astynan kir izdeý» jaqsy qasıet emes, árıne. Biraq, osy «Ońaıdy» engizýshilerdi eshkim tilinen tartqan joq. Jańa ılettendirý júıesi qazaqshalandy dep ózderi súıinshilep habarlady emes pe?! Aıtylǵan ýáde oryndalýy kerek qoı. Kezinde valıdatorlar beretin bılet-chekter de sol qalpy qazaqshalanbaı ketken edi. «Almaty kólik holdıgi» mekemesiniń osy áreketinen keıin bul da sonyń aıaǵyn qusha ma degen qaýip keledi kóńilge. 

Aqnur Jaqsylyq

stýdent