«Ońtústikqazaqstandyq kilem shyǵaratyn «Bal Tekstıl» JSHS jartylaı propılendi jipter shyǵarý men kilem óndirisin keńeıtý boıynsha óz jobasynyń ekinshi kezeńin iske qosty» dep habarlaıdy «Damý» qorynyń saıty.

Búginde «Bal Tekstıl» JSHS-i – Qazaqstandaǵy iri kilem fabrıkalarynyń biri. Kásiporyn kilemder men «BCF», «Heat-Set» , «Frize» tańbaly sıntetıkalyq jartylaı propılendi jipterden toqylǵan qazirgi zamanǵy kilemshe buıymdaryn Belgıada jasalǵan «MICHEL VAN DE WIELE » qurylǵysynda toqyp shyǵarady. Ónim «Turan», «Han-Táńiri», «Lıder», «Alataý», «Saryarqa», «Barys», «ANTIQUE IMPERIAL», «ASTANA DELUXE», «VIZION», «FRIZE», «KASHAN», «SILK» tańbalarynda shyǵarylady. Barlyq kilemder joǵary sapaly ári baǵasy qoljetimdi.

– Kilem óndirisi úshin shıkizatty Túrkıadan, Bangladeshten, Úndistannan, Reseıden jáne taǵy basqa elderden alyp kelemiz. Importtaýshylarǵa táýeldi bolǵan tıimdi emes, sondyqtan bizdiń kompanıa áýelden-aq jartylaı propılendi jipter shyǵarýdy strategıalyq josparlaǵan. Bıyl «Damý» qorynyń qoldaýymen óndiristiń ekinshi kezeńin aıaqtadyq. Endi qajetti jartylaı propılendi jipter bizdiń fabrıkada shyǵarylady. Bul bizge ónim baǵasyn 20% tómendetýge múmkindik beredi, – deıdi fabrıkanyń atqarýshy dırektory Jomart Kerimsheev.

Jartylaı propılendi sıntetıkalyq jipter Fransıada jasalǵan «SUPERBA», Germanıada jasalǵan «Allma Volkmann», «Oerlikon Neumag» fırmalary qurylǵylarynda shyǵarylady.

«Bal Tekstıl» kompanıasy «Damý» qorymen júzege asyrylatyn jeńildik baǵdarlamasynyń sheńberinde qarjylandyrylady. Nátıjesinde kompanıa qajetti qurylǵylardy satyp alyp, óndiristik úderisti retke keltirdi.

Fabrıkanyń óndiristik qýattylyǵy jylyna 2300-5000 myń sharshy metr kilemder men kilemshe buıymdarynan bastap, 3000 tonna jartylaı propılendi jipterdi quraıdy. Fabrıkada 200 adam jumys isteıdi.