DAISH tarapynan áıelderdi ǵalamtor arqyly satatyn keńselerdiń biri Túrkıanyń Gazıantep aımaǵynan tabyldy. Germanıalyq NDR jáne SWR arnalary dál osy DAISH-tyń Gazıantepte ashqan áıelderdi satý ortalyǵy týraly habar taratty.
BAQ taratqan málimetke sensek, ortalyq ár áıeldi 15-20 myń dollar shamasynda satyp, ózge de baılanys ortalyqtary arqyly uıymǵa jiberip kelgen.
Qazirgi tańda kópshilik arasynda keńinen taralǵan whatsapp sekildi basqa da baılanys quraldary arqyly taratylǵan sýretter men jazbalardan áıelder men balalardyń «qul» retinde saýdalanǵany, sonyń ishinde eń kóp aqsha usynǵandarǵa satylatyny, aqsha aýdarymynyń Túrkıadaǵy DAISH baılanys ortalyqtary arqyly uıymǵa jetkiziletindigi anyqtalǵan.
Osy jáıtke qatysty jarıalanǵan beınebaıanda ıraktyq Ábý Mýrat esimdi kisiniń ǵalamtor paraqshasyna kirip, quldyqtaǵy áıelderdi satyp alýǵa árekettengeni, tipti saýdalasýǵa kiriskendigi kórsetiledi. Sondaı-aq, vıdeoda aqsha aýdarymynyń sátti júzege asyrylýy úshin hat almasylady. DAISH Gazıaentepke jol júrý úshin nusqaý beredi. Arada bitimgershilik jasaýshylarmen kezdesken Ábý Mýrat, ótem aqyny olarǵa tabystaıdy.
Jasyryn kamera arqyly, aqsha aýdarymy jasalǵan keńse de kórsetilgen. Munda kálkýlátor arqyly aqsha qabyldanyp alynady. Aqshanyń tikeleı DAISH-qa jóneltilýi úshin, basqa «deldaldarǵa» telefon arqyly habar beriledi. Al eń sumdyǵy, bunyń túrik aqparat qyzmetinde eshqandaı kedergige ushyramaǵandyǵy..
Baýyrjan Karıpov
