Ótken aptada «Qamshy» portalynda «Jaqsybekov prezıdent saıasatyna qarsy ma?» degen taqyrypta maqala jarıalandy. Atalǵan maqalada Astana qalasynda Muz qalashyǵyn salyp jatqan ákimniń áreketin áshkerelegen bolatynbyz. Mine, sol Muz qalashyǵy búginde kúnniń kúrt jylynýy saldarynan erip jatyr. Bul degen sóz, mıllıondaǵan qarjynyń sol muzben birge erip ketkenin kórsetedi.
Dál qazirgi tańda, Qazaq eli eń aýyr qarjylyq daǵdarysty bastan ótkerýde. Sondyqtan da, Memleket basshysy, Nursultan Nazarbaevtan bastap ansha-munshany eleń qylmaıtyn depýtattarǵa deıin únemshildik kerek ekenin aıtyp jatyr. Aıtalyq, taıaýda ǵana prezıdent «Qazaqstan jańa jahandyq naqty ahýalda: ósim, reformalar, damý» degen taqyrypta Joldaý jasady. Memleket basshysy atalǵan Joldaýdyń basynan aıaǵyna deıin únemshildik týraly aıtty. Máselen, "Biz osy jyldar boıy kóp erkelep kettik" deı kele prezıdent sheneýnikterdi kórpege qarap kósilýge shaqyrdy.
– Adam dúkenge kelip, sóredegi taýarlardy kóredi, ustap kóredi de bar oıy qaltasyndaǵy qarajatta bolady, solaı ma? Ol aqshasy jetpeıtin taýardy ustamaıdy. Al memleket nege osylaı etpeýi kerek? Kórpege qarap kósilý kerek. Biz qazir osyǵan baǵyt aldyq. Daǵdarystyń bolǵany jaqsy, sebebi únemdep úırenemiz, aqshany halyqtyń ıgiligine jumsaý kerek. Biz osy jyldar boıy kóp erkelep kettik, sonyń bári munaı aqshasyna, eksport taýarlarynyń kóp aqshasyna baılanysty. Aqsha bárine taratyldy, barlyǵy shtattaryn keńeıtti, barlyǵy da rıza boldy, tynysh ómir súrdi. Munyń áıteýir aıaqtalatyn kezeńi kelýi kerek edi. Keldi de – dedi Nursultan Nazarbaev.
Iá, ákim qaralar prezıdent aıtqandaı únemshildikti úırenýi kerek. Alaıda, Astana qalasynyń ákimi Ádilbek Jaqsybekov búdjet qarjysyn únemdeýdiń ornyna ony ońdy-soldy shashyp jatyr. Máselen, ol buǵan deıin quny 10 mıllıon turatyn jyly aıaldama salyp aıdy aspanǵa shyǵardy. Al, atalǵan aıaldamany reseılik sheneýnikter ne bári 3 mıllıonǵa salǵanyn aıtady. Qytymyr aıazda turatyn astanalyqtar úshin jyly aıaldamalardyń bolǵany durys ta shyǵar. Alaıda, dál qazirgideı daǵdarys kezeńinde atalǵan aıaldamalardy salmaı-aq qoısaq bolar edi ǵoı. Óıtkeni, aıaldama salmady dep qarapaıym halyq renjimeıdi.
Bul az deseńiz, ol Astananyń tórt birdeı jerine Muz qalashyǵyn salyp, búdjettiń qarjysyn rásýa etti. Rásýa etti demeı, nemene, ákim salǵan Muz qalashyǵy kúnniń kúrt jylynýy saldarynan erip jatyr. Bir qyzyǵy ákimdik Muz qalashyǵyna qansha qarjy jumsaǵanyn aıtpaı otyr. Aıtsaq, dál jyly aıaldamalardyń jyryndaı basymyz bálege qalady dep oılasa kerek. Alaıda, atalǵan qalashyqty salýǵa júz mıllıonnan astam qarjy ketkeni anyq. Óıtkeni, ákimdik qalashyqty salatyn arnaıy mamandardy qytaıdan arnaıy shaqyrqan. Al shet eldik mamandardyń elimizge tıyn-teben úshin kelmesi belgili.
