Búgin qoǵamdyq belsendi Botagóz Zarqynqyzynyń úıinde almatylyq polıseıler tintý júrgizdi, - dep habarlaıdy «Qamshy» portaly.

Qoǵam belsendisiniń aıtýynsha, polıseılerdiń bul áreketine áleýmettik jelide Qazaqstandy Reseıge qosý kerek dep separatıstik ıdeıalardy nasıhattaǵan, búginde isi sotta qaralyp jatqan Ermek Taıshybekovtiń aryzy negiz bolypty.

«Búgin Qordaı sotynda Taıshybekov isi boıynsha úkim oqylatyn edi. Men soǵan jınalyp jatqan kezde úıge polısıa qyzmetkerleri keldi. Sizdiń ústińizden ultaralyq arazdyq týǵyzatyn jazbalar jarıalady degen aryz tústi dep polısıalar úıdi tintti. Tintý júrgizýge sanksıalary da bar eken. Qarsylyq tanytpadym. Úıimdi túgel tintti. Al, aryz týraly aıtsam, Ermek Taıshybekov meniń ústimnen shilde aıynda polısıaǵa aryz túsirgen. Onyń separatıstik jazbalaryn jarıalap, zań oryndaryna habarlaǵan soń maǵan jasaǵan qarsy áreketiniń túri. Sodan beri polısıa ol aryzdy qaramaı kelip, búgin esterine túsipti», - deıdi Botagóz Zarqynqyzy «Qamshy» tilshisine.

Polıseıler Botagóz Zarqynqyzynyń úıinen noýtbýgy men qazaqsha ánder men fılmder jazylǵan dıskilerdi tárkilegen.

Sondaı-aq, Botagóz Zarqynqyzy búgin saǵat 15.30-da polısıaǵa tergeýge baratynyn habarlaǵan.