Rýdnyıda polıseıler zeınetaqy taratyp jatqan poshta qyzmetkerine shabýyl jasaǵan 2 kúdiktini ustady. Bul týraly «Qamshy» portaly QazAqparatqa silteme jasap habarlaıdy.

«9 jeltoqsanda Rýdnyı qalasynda poshta qyzmetkerine shabýyl jasady degen kúdikpen 27 jáne 25 jastaǵy eki adam ustaldy, - delingen habarlamada. - Zeınetaqy tóleýge arnalǵan 2 mıllıon teńgeden astam urlanǵan aqsha tárkilendi».

3 jeltoqsanda qarıalardyń úıine zeınetaqy taratqan «Qazposhta» qyzmetkerine podezd ishinde belgisiz bireýler shabýyl jasady. Olar 2 mıllıon 360 myń teńge salynǵan sómkeni poshta qyzmetkerinen tartyp áketken.

«Sol kúni arnaıy tergeý toby qurylyp, ony Qostanaı oblystyq İİD bastyǵynyń birinshi orynbasary polısıa polkovnıgi Atyǵaı Arystanov basqardy, - delingen habarlamada. - Polıseıler tıisti sharalardy uıymdastyryp, kúdiktilerdi qolǵa túsirdi. Olardan urlanǵan aqsha tárkilendi».

Ustalǵandar kinásyn moıyndady. «Qazposhta» bólimshelerine qaýipsizdik sharalaryn saqtaý jónindegi nusqaýlar joldandy.