Páter satýmen aınalysatyn alaıaqtar elordanyń turǵyn úı basqarmasy ǵımaratynan bólme jaldap otyrǵan. Bul týraly brıfıń barysynda Astana qalalyq prokýratýrasy ekinshi basqarmasynyń prokýrory Erlan Baımuhambetov málim etti, - dep habarlaıdy «Qamshy» portaly QazAqparatqa silteme jasap.
«Tómen baǵamen baspana, jer telimin alǵysy keletin adamdardyń qarjylaryn qaltasyna basý úshin bizdiń adamdardyń túrli jaýapkershiligi shekteýli seriktes ashqandyǵy týraly da kóptegen faktiler bar. Mundaı alaıaqtyq jol tipti Astana qalasy boıynsha turǵyn úı basqarmasynyń ǵımaratynyń ishinde de oryn alǵan. Olar ǵımarattan bólme jaldap, azamattardy memlekettik baǵdarlama aıasynda baspana alý múmkindigin jasaımyz dep aldaǵan», - dedi prokýror.
Onyń sózine qaraǵanda, mundaı qylmystyq toptardyń 26 alaıaqtyq jasaǵandyǵy belgili bolyp otyr.
«Buǵan qosa, Astanada JSHS-ashylyp, ol Brıtan koróldik bank arqyly tómen paıyzben nesıe bere alatyndyqtary týraly habarlama bergen. Biraq, is júzinde ondaı bank múldem joq», - dedi ol.
E.Baımuhambetovtiń atap ótýinshe, ańqaý astanalyqtardyń kópshiligi osyndaı alaıaqtardyń qarmaqtaryna tez iligip qalady.
