Búgin Almatydaǵy Qazaqstan Respýblıkasynyń Ulttyq kitaphanasynda Bas múftıdiń bastamasymen shyqqan «Din men dástúr» kitabynyń tusaýkeser rásimi ótti. Qazaqstan musylmandary dinı basqarmasynyń tóraǵasy Erjan qajy Malǵajyuly qatysqan dóńgelek ústelde din men dástúrdiń sabaqtastyǵy, jastardy izgilikke tárbıeleýdiń tetikteri talqylandy.
Jazýshy-qalamgerler Smaǵul Elýbaı, Jumabek Kenjálın, Nurtóre Júsip, Samat Ibraım, Nurǵılı Oraz, Qul Kerim Elemes, Jumabek Tabyn, t.b. aqyn-jazýshylar ýaqyttyń suranysyna saı, der kezinde shyqqan «Din men dástúr» kitaby jaıly oılaryn ortaǵa saldy. Basqosýǵa qatysqandar «Din men dástúr – egiz uǵym. Qos uǵymdy bir-birinen ajyratýǵa bolmaıdy. Dástúrdiń asyl qundylyqtaryn boıyna sińirgen urpaq eshqashan teris ádetterge boı aldyrmaıdy» degen tujyrymdy oıǵa keldi.
«Álemniń eń ozyq elderi baǵyt baǵdaryn dástúrge ıdirip otyrǵan osy zamanda biz de bul úrdisten qalys qalmaýymyz qajet. Qazaqstan musylmandary dinı basqarmasy ýaqyttyń osynaý aýyr júgin sezinip, 2014 jyldy «Din men dástúr» jyly dep jarıalady. Rýhanıatymyzdaǵy mundaı úlken ózgeristerdiń ómirge kelýi – ulttyq bolmysymyzdy qalyptastyrý, ótkenge kóz tastap, bolashaqqa baǵdar jasaý, tarıhtyń taǵylymynan sabaq alýdan týǵan izgi maqsat edi», – dedi Bas múftı.
Erjan qajy Malǵajyuly Ulttyq kitaphana qoryna «Din men dástúr» kitabynyń birneshe danasyn syıǵa tartty.
Tusaýy kesilgen kitapta ar-uıat, dinı rásimderge qurmet, ádeptilik, sypaıylyq, qarapaıymdylyq, eńbek etý, ata-anany qurmetteý, kórshi aqysy, týystyq baılanys, baýyrmaldyq, tileýqorlyq, úlkenge qurmet, kishige izet, t.b. ulttyq qundylyqtarymyzdyń dinmen sabaqtastyǵy keńinen túsindirilgen. Maqal-mátelder men naqyl sózderdiń hadıstermen uqsastyǵy, din men dástúrdiń tyǵyz baılanysy týraly kóptegen málimetter men dálelder keltirilgen.
Kitap jastardy, jalpy oqyrmandardy ulttyq qundylyqtardy qurmetteýge úndeıdi.
Biz osy rette dóńgelek ústelde aıtylǵan salıhaly suhbattyń bir parasyn oqyrman nazaryna usynýdy jón kórdik.
ORAMDY OILAR
Smaǵul ELÝBAI, jazýshy:
Der kezinde jazylǵan derek
«Bizdiń ata-babalarymyz myń jyl boıy Islam dinin qabyldaǵan. Babalarymyz óziniń ulttyq dástúrimen Islam dinin qabattastyra damytqan. Qazaqtyń sharıǵatqa negizdelgen dástúri bar. Osy turǵydan aıtqanda, dástúr men dindi nasıhattaý – barshamyzǵa ortaq ıgi is. Bul iske bastama bolǵan Bas múftıdiń qolǵa alǵan isi barshamyzdy qýantyp otyr. Óıtkeni, bul zıaly qaýym ókilderin tolǵandyrǵan másele edi. «Din men dástúr» der kezinde jazylǵan eńbek, derek der edim».
Jabal SHOIYNBET, Abaıtanýshy-ǵalym:
Bir arnaǵa toǵysqan qundylyqtar
«Abaı atamyz paıǵambarymyzdyń hadısterinen mysal keltire otyryp bylaı deıdi: «Uıat kimde bolsa, ıman sonda». Al bizdiń halyqta jaqsy sóz bar: «Uıaty bardyń – ımany bar». Kórdińiz be, paıǵambardyń dástúrli sózi men qazaqtyń dástúrli sózi osylaı bir arnada toǵysyp jatyr.
Jumabek KENJALIN, jazýshy:
Babalar jolyn jalǵastyraıyq
«Erterekte shyqqan «Qazaq», «Birlik», «Aıqap», «Qazaqstan», «Serke», t.b. gazetterde aqyn-jazýshy babalarymyz izgilik, ımandylyq jaıly óndirip jazyp ketken. Olar temirqazyǵymyz – ımandylyqta jatqanyn barynsha basylymdar arqyly nasıhattady. Sondyqtan búgingi basylymdarda qyzmet etetin áriptesterime babalar jolyn jalǵastyrý qajettigin basa aıtqym keledi. Tipti, «Din men dástúr» kitabynan úzindiler berip otyrsaq ta úlken isti tyndyrǵan bolar edik.
Qul Kerim ELEMES, aqyn:
Kitapty kóbeıtip kitaphanalarǵa taratsaq...
«Men osy rette bir usynys aıtqym keledi. «Din men dástúr» kitabynyń tırajyn kóbeıtip, elimizdegi barlyq kitaphanalarǵa tegin taratsaq. Sonymen qatar, mektepterde osy taqyryp aıasynda tárbıe saǵattaryn ótkizsek, nur ústine nur bolar edi. Sonda ǵana biz urpaǵymyzdy jaman ádetter men teris qylyqtardan aman alyp qalar edik. Jastardyń boıynda ımandylyq qalyptaspaıynsha, biz jamandyq ataýlymen tabandy túrde kúrese almaımyz.
Aǵabek QONARBAIULY, QMDB baspasóz hatshysy
