Májilis depýtat Qojahan Jabaǵıev Balýan Sholaqtyń týǵanyna 150 jyl tolýyna oraı oǵan qatysty derekterdi tolyqtyryp, mádenı sharany qolǵa alýdy surady dep habarlaıdy Tengrinews.kz tilshisi. "Balýan Sholaq – zamanynda qazaq án óneriniń tamasha oryndaýshysy, nasıhatshysy bola júrip, qazaqtyń ánshilik ónerin órkendetýge úlken úles qosqan kompozıtor. Balýan Sholaqtyń jıyrmaǵa jýyq áni bolǵanymen, búgingi kúnde olardyń halyq arasynda nasıhattalýy tómen. Aqyndyq qyry múlde zerttelmegen", - deıdi Q.Jabaǵıev. Úkimetke joldaǵan saýalynda depýtat Balýan Sholaqtyń ómirbaıany jóninde zertteýler áli kúnge naqtylanbaǵanyn aıtady. Qazaq rýhanıaty men mádenıetiniń qalyptasýynda orny bar tulǵanyń dúnıege kelgen jeri men qaıtys bolǵan jylyna qatysty ártúrli derekterdi naqtylap, 150 jyldyq mereıtoıy qarsańynda osyndaı jumystar atqarylsa dep tilek bildirdi. "Balýan babamyzdyń óz ulty úshin jasaǵan kúreskerlik qaıratkerligin qazirgi urpaqtyń bile bermeıtini qynjyltady. Óıtkeni, Balýan Sholaqtyń ult-azattyq kóterilisindegi orny da anyqtalmaǵan. Ol týraly ultymyzdyń kórnekti jazýshysy Sábıt Muqanovtyń "Balýan Sholaq" povesinde jáne belgili jazýshy, dramatýrg Dýlat Isabekovtiń "Jaýjúrek" atty týyndysynda aıtylǵanymen, muny jetkiliksiz dep esepteımiz", - dedi Qojahan Kókirekbaıuly Úkimetke joldaǵan saýalynda. Sonymen qatar, Májilis depýtaty Almaty qalasyndaǵy Balýan Sholaq atyndaǵy sport jáne mádenıet saraıynyń aldyna balýannyń eskertkishin ornatyp, ol týraly kórkem jáne derekti fılm túsirýdi qolǵa alý kerektigin alǵa tartyp otyr.