Qazaqstannyń Syrtqy ister mınıstri Erlan Ydyrysov Qazaqstandy Reseıden bireýler alystata alady dep oılaý qate ekenin málimdedi, - dep habarlaıdy «Qamshy» portaly «Qazaqstan jańalyqtaryna» silteme jasap.
Mınıstrdiń aıtýynsha, Qazaqstannyń búgingi ustanymy «barlyǵyna utymdy» fılosofıasyna saı kórinedi. Erlan Ydyrysov myrza barlyq qatysýshylardyń múddelerindegi alshaqtyqqa qaramastan Eýrazıa jáne Ortalyq Azıa alańy múddeler úılesimin qamtamasyz ete alady dep sanaıdy. Onyń oıynsha, ár eldiń óziniń aıtarlyqtaı artyqshylyqtary bar.
«Eshkim Qazaqstannyń eń úlken kórshimiz Reseıge jaqyndyǵyn joqqa shyǵara almaıdy. Bizdi tarıh, demografıa men mádenıet biriktiredi. Sondyqtan, bizdi Reseıden bireýler alshaqtata alady dep oılaý qatelik bolady» dedi mınıstr sársenbi búgin ótkizgen baspasóz máslıhatynda.
Sondaı-aq, mınıstr Ortalyq Azıa ekonomıkasyn qoldaý resýrstaryna ıe Qytaıdyń da ekonomıkalyq potensıalyn joqqa shyǵarý múmkin emes dep sanaıdy. E. Ydyrysov myrza AQSH pen Eýropa elderiniń de tehnogıalyq potensıalyna tıisti baǵa berý kerek degen pikirde.
«Úshinshiden, eshkim Batystyń – AQSH pen Eýropanyń joǵary tehnologıalyq potensıalyna daý aıta almaıdy. Olarda ozyq tehnologıalar, tájirıbeler men keń taraǵan bıznes-standarttar bar», - deıdi ol.
Eldiń múddesin halyqaralyq deńgeıde qorǵaýǵa tıis Syrty ister mınıstriniń bul málimdemesi qazaqstandyq múddeden góri, soltústik kórshiniń kóńilin tabýdy ǵana maqsat etken qýlyqqa kóp uqsaıdy. Olaı deıtinimiz, Reseıge qatysty máselelerde qazaqstandyq bılik únemi qoǵamdyq pikirden alshaq ustanymyn tanytyp keledi. Reseılik Sý-24 ushaǵyn túrkıalyq áskerıler óz aspanynda atyp qulatqanda da syrtqy saıasat salasynda uzaq jyldyq tájirıbesi bar Senat tóraǵasy Qasym-Jomart Toqaev Túrkıa bıligin ashyq aıyptap, Reseıdi qoldaıtyn pikir bildirdi.
Buǵan deıin reseılik aqparat quraldary Eýrazıalyq Odaq elderi ortaq valútaǵa kóshýi kerek degen usynysty keńinen nasıhattaǵanda da Qazaqstannyń syrtqy ister vedomstvosy bul máselege qatysty el bıliginiń naqty ustanymyn jetkize almady. «Ortaq valútaǵa kóshý kún tártibinde turǵan joq» degen dúdamal pikir bar bolǵany Prezıdent keńesshisi – Baspasóz hatshysy Dáýren Abaevtyń aýzymen aıtyldy.
Reseı men Túrkıa shıelenisi saldarynan qazaqstandyq júk kólikteri Reseı shekarasynan óte almaı turyp qalǵanda da qazaqstandyq dıplomattar máseleni halyqaralyq qatynastar talaptaryna saı sheshýge aralaspady. Qazaq kásipkerleriniń múddesin «Atameken» ulttyq kásipkerler palatasy ǵana qorǵap shyǵyp, Túrkıadan tasylatyn taýarlardy elge Reseıdi aınalyp ótetin baǵyttar boıynsha jetkizýge shaqyrdy. Sanamalaı berse, mundaı mysaldar jetip artylady.
Erlan Ydyrysov myrza «Reseı men Qazaqstandy ortaq tarıh pen mádenıet baılanystyrady» degen jattandy uranmen qarama-qaıshylyqtardy búrkemeleı salǵysy keledi. Áıtpese, tarıhty qozǵasaq Reseı tarapynan qazaqtarǵa jasalǵan qysym men qorlyqtyń neshe atasyn tabasyz. Al, endi Qytaıdyń ekonomıkalyq potensıaly men batystyń ozyq tehnologıalaryna «mán bere» sóıleýin Qazaqstan bıliginiń «kóp vektorly saıasat» dep at qoıyp, aıdar taqqan saıası quıtyrqylyǵyna tán kezekti arzan qýlyq demeske shara joq.
Jomart Abdollauly
