Osydan biraz buryn saıtymyzda Qytaılyq araq zaýyttary qazaqtyń ulttyq kıimi qamzol úlgisinde bezendirilgen araq shyǵaryp jatqanyn jarıalaǵan bolatynbyz. Endi Qytaıdyń memlekettik organdary atalǵan araqty satylymnan alyp, buǵan deıin óndirilgen ishimdik ónimderin joıý týraly uıǵarym shyǵardy degen habar jetip otyr.

Dálirek aıtsaq, İle qazaq avtonomıaly oblysy Kúnes aýdandyq partıa komıteti aqparat quraldary men jergilikti turǵyndar arasynda týyndaǵan «Sorbulaq», «Jibek joly ańyzy» araqtarynyń shyǵarylýy qazaq halqynyń ulttyq dástúrlerin qorlaýǵa baǵyttalǵan áreket degen narazy pikirge oraı ulttyq din isteri, bazar basqarý mekemesi syndy birqatar memlekettik organdarmen birlesken top quryp, atalǵan máseleni zerttegen.

«Top jumysy nátıjesinde ótken jyldyń 30 jeltoqsanynda atalǵan alkogóldik ónimderdi shyǵarý ulttyq máselege qaıshy keletini anyqtalyp, qazaq halqynyń dástúri men ulttyq namysyn qorlaıdy degen uıǵarym shyǵarylǵan. İshimdik ónimin shyǵarýshy «Sorbulaq» alkogóldi ónim óndirýshi seriktestikke 15000 ıýán kóleminde aıyppul salynyp, Úrimji qalasynda ornalasqan «Laý-fań» saýda seriktestigine osy kúnge deıin shyǵarylǵan «Sorbulaq», «Jibek joly ańyzy» araqtaryn aınalymnan jınap alyp, joıý tapsyrylǵan» delingen Kúnes aýdanynyń basshylyǵy taratqan habarlamada.