«Ultaralyq arazdyqty qozdyrdy» degen aıyppen qamaýǵa alynǵan qoǵam belsendileri Ermek Narymbaev pen Serikjan Mámbetálınniń isi boıynsha búgingi sot otyrysynda basty kýágerdiń biri Murat Telıbekovten jaýap alyndy, - dep habarlaıdy Azattyq.
Qos aıyptalýshy Murat Telıbekovtiń «Veter s ýlısy» kitabynan úzindi jarıalaǵany úshin isti bolyp jatqany belgili. Alaıda, ózin Qazaqstan musylmandar odaǵynyń tóraǵasy dep tanystyratyn M. Telıbekov ǵalamtorda jarıalanǵan kitap nusqasyna óziniń qatysy joqtyǵyn málimdedi.
Sotqa kitaptyń 1994 jyly jarıalanǵan nusqasyn alyp kelgen ol osy nusqany sot materıaldaryna qosýdy suraǵan.
Biraq, M. Telıbekov «Atalǵan kitapty 90-jyldary jazǵanmen, shyǵarýdyń sáti túspedi. Al, onyń ınternette jarıalanǵan nusqasyna meniń qatysym joq», - degen.
Búgin sondaı-aq, sotta lyakhov.kz saıtynyń ıesi Aleksandr Láhovtan da jaýap alyndy. Aıyptalýshy S. Mámbetálın atalǵan saıttan qazan aıynda M. Telıbekovtiń «Veter s ýlısy» kitabyn taýyp, úzindisin áleýmettik jelide jarıalaǵanyn aıtýda. Alaıda, saıt ıesi saıtta ol kitaptyń joqtyǵyn aıtyp, qosymsha túsinik bergen.
Onyń aıtýynsha, saıtta atalǵan kitap shamamen 2002 jyly jarıalanyp, eki-úsh jyl buryn túrli pikirler kóbeıgen soń saıttan alynyp tastalǵan. Alaıda, qyrkúıek aıynda, kitap belgisiz sebeptermen jáne A. Láhovtyń aralasýynsyz saıtqa qaıta shyǵyp ketedi. Sol ýaqytta materıal saıttan taǵy da óshiriledi.
S. Mámbetalın sot otyrysy barysynda qazan aıynda saıttan atalǵan kitapty oqyǵanyn, qazaq halqynyń ar-namysyna tıetin úzindisin synǵa alyp, Feısbýk jelisine jarıalaǵanyn aıtty. Dálel retinde UQK mamandarynyń zertteý qorytyndysy men saıt betiniń atalǵan kitap úzindisi jarıalanǵan skrın-shotyn kórsetti. Alaıda, A. Láhov buǵan plenkaly fotoaparatqa túsirilgen sýretten basqa, eshqandaı skrın-shot mundaı jaǵdaıda dálel bola almaıtynyn, skrın-shotty qoldan jasaýǵa bolatynyn aıtyp, qarsylyq bildirgen.
Esterińizge salsaq, qoǵam belsendileri Ermek Narymbaev pen Serikjan Mámbetalın ótken jyldyń qazan aıynan beri «Ultaralyq arazdyq týǵyzdy» degen aıyppen qamaýda otyr. Tergeý barysynda jáne sot otyrystarynda olar ózderine taǵylǵan aıypty moıyndaýdan bas tartýda.
Eskertý: Sýretter Azattyq saıtynan alyndy.
