Búgin Ulttyq ulan «Ońtústik» óńirlik qolbasshylyǵynda Qazaqstan Respýblıkasy Ulttyq ulanynyń qurylǵanyna 24 jyl tolý qurmetine oraı saltanatty kesh bolyp ótti, - dep habarlaıdy «Qamshy» portaly qolbasshylyqtyń baspasóz qyzmetine silteme jasap.
İs-sharaǵa óńirlik qolbasshylyq ofıserleri, kelisimshart áskerı qyzmetshileri, sarbazdar, ózara birlestiktegi is-qımyl organdarynyń qyzmetkerleri jáne Ulttyq ulan ardagerleri qatysty.
Saltanatty jıynda «Ońtústik» óńirlik qolbasshylyǵynyń qolbasshysy general-maıor Álibek Serálıev ulandyqtardy kásibı merekelerimen quttyqtap, qyzmettik-jaýyngerlik mindetterin oryndaýda kózgen túsken áskerı qyzmetshilerdi jáne óskeleń urpaqty patrıottyq rýhta tárbıeleýge qosqan úlesteri úshin Ulttyq ulan ardagerlerin medaldarmen jáne gramotalarmen marapattady.
Qolbasshy óz sózinde Elbasymyz N.Nazarbavtyń Ulttyq ulan áskerine erekshe kóńil bóletinin aıta kelip, Astana qalasyndaǵy áskerı qalashyqty ashý kezinde aıtqan «Senderdiń aldaryńda bizdiń zańdarymyzdy buzatyn qylmysqa qarsy kúresý jáne eldiń tynyshtyǵyn kúzetý mindetteri tur.Sender bizdiń Qarýly Kúshtrdiń bir bóligisińder. Qajet jaǵdaıda barlyqtaryń birlesip, armıa quramynda elimizdiń Táýelsizdigi men Otanymyzdyń tynyshtyǵyn qorǵaıtyn bolasyńdar. Osyndaı memlekettiń qamqorlyǵyna sender ózderińniń qajyrly eńbekterińmen, qaıtpas qaısarlyqtaryńmen jáne Otan aldynda turǵan kez kelgen buıryqty tapjylmaı oryndaıtyndaryńa men senimdimin!» degen sózderin mysalǵa keltirdi.
Jıyn barysynda sóz alǵan Ulttyq ulan ardageri, otstavkadaǵy polkovnık Gennadıı Faleev te barsha ulandyqtardy merekelerimen quttyqtap, olarǵa júrekjardy tilekterin arnady.
Marapattaý is-sharasynan keıin kesh merekelik baǵdarlamaǵa ulasty.
Esterińizge salsaq, Ulttyq ulannyń jaýyngerlik tarıhı jylnamasy sonaý táýelsizdiktiń alǵashqy jyldarynda, 1992 jyly 10 qańtarda Elbasy Nursultan Ábishuly Nazarbaevtyń «Qazaqstan Respýblıkasy İİM İshki áskerleri týraly» Jarlyǵyna qol qoıǵannan bastap jazyla bastady.
"2015 jyldyń basynda «Qazaqstan Respýblıkasynyń Ulttyq ulany týraly» zań qabyldanyp, İshki áskerge Ulttyq ulan mártebesi berildi. Tynyshtyqtyń tuǵyrynda turǵan kúsh-qýat qurylymyna zań aıasynda jańa arnaıy mindetter júkteldi, qyzmettiń naqty tarmaqtary men maqsattary aıqyndaldy, áskerı qurylymnyń mártebesi joǵarylatyldy. Ózderiniń daıarlyǵyn, kásibı biliktilikterin joǵarylatý, tájirıbelik bilimderin arttyrý arqyly ulandyqtar kúsh-qurylym organdary arasynda laıyqty ornyn aldy" delingen baspasóz qyzmeti taratqan habarlamada.
Búginde Ulttyq ulan áskeri qoǵamdyq tynyshtyqty saqtaý, mańyzdy memlekettik nysandardy qorǵaý, sottalǵandardy kúzetý men aıdaýyldaý, memleket aıasynda ótkiziletin is-sharalardyń qaýipsizdigin qamtamasyz etý sekildi birqatar ózine júktelgen mindetterdi tabysty oryndaýda.
