21 qyrkúıekte tramvaıdyń qatysýymen Almatyda bolǵan jol apatý boıynsha sot aldy tergeý aıaqtalyp, is sotqa jiberildi, - dep habarlaıdy «Qamshy» portaly.

Sotta kináli retinde vagon júrgizýshisi Elena Stkolnıkova, onyń tálimgeri I. Chýchkalova men tramvaı deposynyń mehanıgi N.Nıkonenko jaýap bermek.

«Aıyptaý aktisine sáıkes, N.Nıkonenko tramvaı deposynyń mehanıgi retinde tehnıkalyq aqaýy bar kólikti paıdalanýǵa jibergen. Sonyń saldarynan adam densaýlyǵyna abaısyzda nuqsan keltirý oqıǵasy oryn aldy. Bul áreketter QR QK-niń 348-baby 2-bólimi boıynsha kvalıfıkasıalanady» delingen Almaty qalalyq soty taratqan habarlamada.

I.Chýkchalova bolsa júrgizýshilerdiń tálimgeri bola tura laýazymdyq nusqaýlyqtardy buzǵan. Sondaı-aq, ol tramvaıdyń óz betimen júrip ketýine jol bergen. Júrgizýshi E.Stekolnıkova bolsa aqaýy bar tramvaıdy basqarý arqyly jol erejesin buzǵan.

İs sotqa jiberilgenimen atalǵan is boıynsha aldyn ala sot tyńdaýy ótetin merzim áli belgilenbedi.