Ál-Farabı atyndaǵy Qazaq Ulttyq ýnıversıtetinde jyl sońynda ádettegideı aqsaqaldar keńesiniń qorytyndy otyrysy ótip, onda ýnıversıtettiń ǵylymı, oqý, qoǵamdyq jumystary men asa ózekti máseleler talqylandy.
Alǵy sózdi alǵan QazUÝ rektory Ǵalymqaıyr Mutanov, qoǵamdyq aqsaqaldar keńesiniń jańa múshelerin usyndy. Fılologıa ǵylymdarynyń doktory Berikbaı Saǵyndyquly men fızıka-matematıka ǵylymdarynyń doktory Zeınolla Jańabaev bir aýyzdan maquldandy. QazUÝ Aqsaqaldar keńesi ǵylym men bilim salasyna úlken úles qosqan ýnıversıtettiń asa bedeldi, tájirıbeli 15 ǵalymnan turady.
QazUÝ birinshi prorektory Muhambetqalı Búrkitbaev ótip bara jatqan 2015 jylda atqarylǵan jumystar týraly baıandamasyn baıandady. Onda kórsetilgenindeı, QazUÝ negizgi jetistikteriniń biri - álemdik úzdik 800 ýnıversıtetterdiń arasyndaǵy QS reıtıńisinde sońǵy jylda 30 satydan attap, 275 orynǵa kóterilýi. QazUÝ tuńǵysh ret Qazaqstan jáne Ortalyq Azıa ýnıversıtetteri arasynda osyndaı aıtýly jetistikke jetti. Sheteldik sarapshylardyń pikirinshe, qysqa merzim ishinde álemniń eń úzdik 300 ýnıversıteti qatarynan kóriný – naǵyz álemdik fenomen. Búginde QazUÝ kadr ustahanasyna aınalǵan irgeli oqý orny klasıkalyq úlgiden zertteý ýnıversıtetine aınalýdy kózdep otyrǵandyǵyn aıta ketý kerek.
Sońǵy jyldary ýnıversıtet qabyrǵasynda «ıdeıa týdyrýynan ony komersıalaýǵa deıin» atty tehnologıalyq dáliz qurylyp, tıimdi jumys jasalýda. 2015 jyly QazUÝ ǵalymdary men qyzmetkeleri 21 oń sheshim alyp, 90 patentke ıe boldy. Onyń 3-eýi AQSH memleketi tarapynan berildi. Ýnıversıtet ǵalymdary men qyzmetkerleri 600 jobany júzege asyryp, 172 halyqaralyq qorlar men uıymdardyń granttaryna ıe boldy. Sonymen qatar Thomson Reutersı Scopus málimetter bazasyna kiretin ǵylymı basylymdarynda shyqqan árbir 5-shi maqala QazUÝ ǵalymdaryna tıesili, ári Hırsha ındeksiniń 2015 jyly jalpy sany 661 qurady. Ál-Farabı atyndaǵy Qazaq Ulttyq ýnıversıtetinde osy ótken kezeńde keshendi qurylymdyq jańǵyrtý júrgizilip, nátıjege baǵyttalǵan menedjment prosesin basqarý jáne jetistikti reıtıńtik baǵalaý júıeleri engizildi.
Álemniń jetekshi ýnıversıtetteri úlgisimen QazUÝ-da halyqaralyq joǵary standartqa saı jáne halyqaralyq tirkeýden ótken tájirıbelik bilim baǵdarlamalary oqý prosesine engizildi. Ýnıversıtettiń jemisti jumys qorytyndylarynyń biri - álemdik jetekshi joǵary oqý oryndarynyń (EO, AQSH, MDP/Global Classroom, Japonıa, TMD jáne tb.) eki dıplomdyq baǵdarlamalaryn júzege asyrý boldy. QazUÝ zerthanalary Rostok ýnıversıtetinde (Almanıa), Karachı q. ınstıtýtynda (Pákistan), Iordanıada ál-Farabı ortalyǵy ashylyp, Sýkýba ýnıversıtetimen «Kampýstaǵy kampýs» atty joba iske asyrylýda (Japonıa).
Qazaqstanda alǵash ret ýnıversıtet bazasy negizinde halyqaralyq UNIFORM stýdenttik jobasyn júzege asyrý aıasynda Tokıo ýnıversıtetimen birge «Ál-Farabı-1» jáne «Ál-Farabı-2» ǵylymı - tehnologıalyq nanospýtnıkter jasaldy. Sondaı-aq, «Indýstrıaldy-ınnovasıalyq damýdyń memlekettik baǵdarlamasy–2» (IIDMB-2) boıynsha kadrlar daıarlanýda.
Ýnıversıtette «Hewlett-Packard», «Samsung», «Cisco», «Konikca minolta», «Microsoft», «Alcatel» kompanıalardyń oqý jáne ǵylymı-zertteý ortalyqtary qurylyp jumys isteýde. Stýdenttik bıznes-ınkýbator qurylyp, Start-up ı Spin-off kompanıalar jolǵa qoıylǵan. Halyqaralyq yntymaqtastyq, akademıalyq mobıldilik, áleýmettik seriktestik salasynda da ýnıversıtettiń damý qarqyny joǵary. Jumys berýshiler arasynda QazUÝ túlekterine suranys kóp.
Taǵyda bir aıtýly jetistikterdiń biri - Qazaqstan Respýblıkasynyń Prezıdenti N.Nazarbaevtyń Ǵylym men tehnıka salasyndaǵy Memlekettik syılyǵyn berý jónindegi Jarlyǵymen QazUÝ-dyń eksperımenttik jáne teorıalyq fızıka ǵylymı-zertteý ınstıtýtynyń bir top ǵalymdary Memlekettik syılyqtyń laýreattary atandy.
Aqsaqaldar alqasy QazUÝ-da jańadan 15-shi medısınalyq fakúltet – Qoǵamdyq densaýlyq saqtaý mektebiniń ashylýyn joǵary baǵalady. Munda bakalavrıat, magıstratýra, rezıdentýra, doktorantýra - bilim berýdiń barlyq deńgeıindegi medısınalyq kadrlardy daıyndaý baǵdarlamalary halyqaralyq standarttarǵa saı jáne sońǵy ǵylymı jetistikterge negizdelip júzege asady.
Baıandamany tyńdaǵan ǵalym aqsaqaldar ýnıversıtet jumysyna oń baǵa bere otyryp, gýmanıtarlyq ǵylym ókilderin iri jobalarǵa tartyp, ǵylymǵa qajetti súbeli ǵylymı eńbektiń dúnıege kelýine jaǵdaı jasaýdyń qajettigin jáne arheologıa men etnografıa salasyna arnalǵan oqýlyqtardy shyǵarý týraly másele kóterdi. Aqsaqaldar keńesiniń tóraǵasy QR ǵylymyna eńbegi sińgen qaıratkeri, QR UǴA akademıgi, QR Joǵarǵy mektep akademıasynyń akademıgi, zań ǵylymdarynyń doktory, profesor Sultan Sartaev jıyn sońynda ýnıversıtettiń barlyq profesorlary men ustazdaryn jańa 2016 jylmen quttyqtap, shyǵarmashylyq tabys pen densaýlyq tilep, TMD elderi arasyndaǵy úzdik ýnıversıtettiń odan ary qaraı órlep, joǵary reıtıńterge jete berýine baǵyttalǵan aýqymdy jumystardy atqarý qajettigine jiti nazar aýdartty.
Gúl Baıandına
QazUÝ baspasóz qyzmeti
