TENTİREP QAZAQ KETPESİN?!.

Biz qaıda baryp kiremiz,

Ne túrin kórip mazaqtyń?

Zamanda ómir súremiz,

Qadiri ketken qazaqtyń!

Búginde kileń qul keshshe,

Bir bále tappaı súıkener,

Asyp ta tasyp kún keshse,

«Shúldir» men «Shúldir bıkeler»,

Keýdesin tosyp daýylǵa,

Úmitim bir kún óshe me?

Al Qazaq, qyrda aýylda,

Ólmestiń kúnin keshe me?

İldalala menen áreńmen

Kún keship júr ek óńgemiz.

Bolmastan baby áýelden,

Tentirep ketti teńgemiz!..

Sen barmyz jáne men barmyz,

Túbime mynaý jetpesin!

Endigi úmit tek jalǵyz:

Tentirep Qazaq ketpesin!..

SAǴYNYSH-ǴUMYR

...Men úshin búgin ol kúnder - uly saǵynysh,

Men úshin búgin ol túnder - uly saǵynysh.

Tas-talqan etip, dál búgin kúıki tirlikti,

Janymda búgin astań da kesteń jyrylys!

Oılardyń nebir súreńsiz anaý túnegin,

Naızaǵaı jyrmen aıysh ta uıqysh tilemin!

Dúnıe dúrs-dúrs, ǵalamym tutas silkingen,

 Shyqqandaı atyp keýdemnen meniń júregim!

İshinde júrmin sary ala ana saǵymnyń,

Kún demeı jáne tún demeı qansha sabyldym?

Júregim sazyp nemese shanshyp ketkendeı,

Men búgin múmkin sol jandy qatty saǵyndym?..

Alystan talyp, jetkendeı ázer kómeski ún,

Áli kún ózim ishinde júrmin elestiń,

Ótse de aılar, ótse de jyldar qanshama,

Saǵynyshtarymdy basa alatuǵyn emespin.

Esimnen ketpes ol kúnder - qaıda shýaqty?

Esimnen ketpes ol túnder - qaıda shýaqty?

Rasyn aıtsam, tutastaı meniń ǵumyrym,

Saǵynyshtardan turatyn ǵumyr sıaqty...

ULY SEZİM TÝRALY BİR JYR...

Bul jóninde nebir aqyn tolǵaǵan,

Bul shaıqasta ózin talaı qorǵaǵan.

Baıan etem bir oqıǵa jaıynda,

Bul ómirde bolǵan, múmkin bolmaǵan...

...Dep júrgende: «endi qaıtyp jolaman...»

Ǵashyq bolyp qalǵandaımyn men oǵan.

Kúndiz-túni ketpeıdi bir esimnen,

Qyzyl gúldeı úlbiregen sol adam.

Syılaıtyndaı, «bárin, bárin, bárin...» dep,

Ol kúıdirer alalaýlaǵan jalyn bop,

Osy sulý alǵandaı ma sıqyrlap,

Odan uzap ketetindeı qalim joq...

Kózderine onyń bir muń tunǵandaı,

Keýdesinde bir janartaý tynǵandaı,

Mundaı kúıdi buryn talaı keshsem de,

Myna sezim tuńǵysh bolyp turǵandaı.

Uly sezim - qaı jasqa da qaramaı,

Tursań daǵy qalap, meıli qalamaı,

Uly sezim - perishtedeı ǵajaıyp,

Biraq tátte qonady eken, ǵajap-aı...

ÓZ BASYM QATTY SHARSHADYM...

Joq qylǵan ulttyń muratyn,
Ózinshe keńes quratyn,
Telearnalary shetinen
Jyndy-súreılerden turatyn,

Qazaqty ǵana jat qylǵan,
Ózgeniń bárin shat qylǵan,
Qazaqtyń Dinin, Tilimen,
Kúl kúresinge laqtyrǵan,

Shyǵarǵan jaıdyń shań-shańyn,
Kózinde ulttyń qansha muń,
«Qazaqstandyq qoǵamnan» -
Óz basym qatty sharshadym...

Jumash Kenebaı