Búgin Tájikstan parlamenti el konstıtýsıasyna ózgerister men tolyqtyrýlar engizý týraly zańdy qabyldady. Oǵan sáıkes prezıdent Emomalı Rahmonǵa sheksiz márte prezıdenttike saılaný múmkindigi beriledi, - dep habarlaıdy «Qamshy» portaly.

Prezıdent saılaýyna túsý úshin adamnyń jasyna qoıylǵan shekteýler de ózgerdi. Bul ózgertý "Emomalı Rahmonnyń uly kelesi prezıdent saılaýyna túsedi» degen boljamdy kúsheıtti.

Buǵan deıin, Tájikstanda prezıdentke «ult kóshbasshysy» ataǵyn beretin zań qabyldanǵan. Azattyqtyń Tájik redaksıasynyń habarlaýynsha, prezıdent Emomalı Rahmon 25 jeltoqsanda «Ult kóshbasshysy - beıbitshilik pen ulttyq birliktiń negizin qalaýshy týraly» zańǵa qol qoıǵan. Zań jobasyn parlament 18 jeltoqsanda maquldaǵan.

16 baptan turatyn zań jobasynda «beıbitshilik pen ult birliginiń negizin qalaýshy», «ult kóshbasshysy» uǵymdaryna túsinik berilip, «ult kóshbasshysynyń» quzyreti, onyń jeke basyna qol suǵylmaý quqyǵy, qaýipsizdigin qamtamasyz etý men áleýmettik kepildik berý, orden men memlekettik syılyq taǵaıyndaý erejeleri bekitilgen.

Parlamenttyń tómengi palatasy - Madjlıs namoıandagon spıkeri Shýkýrdjon Zýhýrov buǵan deıin Rahmondy "tájik halqy úshin kóp nárse jasaǵan batyr" dep ataǵan. Ol bul «tarıhı» zań jobasy eldegi demokratıalyq prosesterge «qaıshy kelmeıtinin» málimdegen.

Tájikstan konstıtýsıasy 1994 jyly azamat soǵysy kezinde búkilhalyqtyq referendým arqyly qabyldanǵan. Oǵan 1999 jáne 2003 jyly taǵy da referendým arqyly ózgerister engizilgen. 2003 jyly engizilgen ózgerister prezıdent Emomalı Rahmonǵa jeti jyldyq eki merzim boıy, ıaǵnı 2020 jylǵa deıin bılikte otyrýǵa múmkindik bergen.