Búgin Ortalyq komýnıkasıalar qyzmetindegi baspasóz máslıhatynda Almaty ákimi Baýyrjan Baıbek «Ońaı» júıesine qatysty túsinik berdi.

«Eń mańyzdy máselelerdiń biri - ol «Ońaı» júıesine baılanysty. Bul óte mańyzdy baǵyt dep esepteımiz. Osy turǵyda kúndelikti monıtorıń júrgizýdemiz. Atap aıtqanda, elimiz boıynsha biz osy júıege qosylǵan birinshi qala bolyp tabylamyz. Ózderińiz bilesizder, Sıngapýr, Gonkong jáne aldyńǵy qatarly ózge de ońtústik-shyǵys elderdegi shaharlar kartalarmen (qoǵamdyq kólikterde júrýge arnalǵan) jumys isteýde. Búginde kóbisi qoıyp júrgen negizgi saýal jol júrý bıletteriniń qysqarýyna baılanysty bolyp otyr. Jalpy, biz osy naryqtyń aýqymyn aıqyndaý úshin birshama ýaqyt suradyq. Buǵan deıin bul naryq tolyqtaı ashyq emes, túsiniksiz bolǵan edi, ıaǵnı shyǵystar men kirister qanshalyqty ekeni aıqyn emes edi. Búginde biz naryq kólemi 19-20 mlrd. teńge ekenin baıqap otyrmyz, al shamamen 6-7 mlrd. teńgeni «surqaı ekonomıkadan» shyǵaramyz dep paıymdaýdamyz», - dedi ákim.

Onyń sózine qaraǵanda, búginde qoǵamdyq kólik tasymaly boıynsha halyqtyń pikiri nazarǵa alynyp, erteń máslıhat otyrysynda depýtattar qoldasa, onda jol júrý bıletteri qaıta iske qosylady.

«Jeti jasqa deıingi balalar aqysyz júredi, mektep jasyndaǵy oqýshylar úshin myń teńge, zeınetkerlerge eki myń teńge jáne kóp balaly analarǵa eki myń teńge, stýdentter úshin úsh myń teńge qarastyrylýda. Sonymen qatar, birinshi jáne ekinshi toptaǵy múgedekter, UOS ardagerleri men olarǵa teńestirilgen adamdar qalada tegin júredi. Bul baǵyttaǵy shyǵystar jergilikti búdjet úshin qomaqty qarjy», - dedi B. Baıbek.