Qazaqstandaǵy SATEK», «SATEK Investment Grýpp», «KGNT Holding», «Kaýstık» syndy birqatar kompanıalarda aktıvteri bar jáne quramyna «7-arna», Vesti.kz, Tengri FM kiretin «Alash medıa grýpp» JSHS men «STV» arnasy» JSHS-nyń jalǵyz qatysýshysy Aleksandr Klebanov Izraıl azamaty kórinedi. Onyń memlekettiń bılik organdaryna, sol arqyly memlekettik qupıalarǵa ıelik etý múmkindigi bar, - dep jazady «DAT» jobasy.
Basylym KazTAG agenttigine silteme jasaı otyryp, A. Klebanovtyń 1998 jyldyń qarashasynda Izraıl azamattyǵyn alǵanyn jazady. Agenttikke bul týraly atalǵan memlekettiń absorbasıa (repatrıanttar isi jónindegi) mınıstrligindegi derekkóz habarlaǵan.
«Qazaqstandyq Aleksandr Klebanov – Izraıl azamaty. Jalpy Qazaqstannan otanyna oralǵandarǵa onyń Izraıl memleketiniń azamattyǵyn alǵany qupıa emes. Onyń 1998 jyly qarasha aıynda azamattyq alǵany bizge belgili. bizde óziniń evreı ekenin dáleldeý prosesi óte kúrdeli. Biraq, Klebanov jaqyn týystary arqyly jergilikti memlekettik organdardy azamattyq alýǵa jáne pasportqa ıe bolýǵa sendirgen», - deıdi ol derekkóz.
Basylym sonymen birge, A. Klebanovtyń «Airfinance Europe LTD» kompanıasynyń qazaqstandyq bólimshesiniń basshysy, «Orient Eagle» áýe tasymaldaýshy kompanıasynyń jáne prezıdenttik «Búrkit» avıakompanıasynyń jetekshisi retinde memleket basyndaǵy tulǵalardyń el ishindegi jáne sheteldegi saparlaryna qyzmet kórsetkenin, bul laýazymdarda júrip onyń memlekettik qupıalarmen tanysýyna, memleket basshylyǵyndaǵy tulǵalardyń júris-turysyn zertteýine tolyq múmkindigi bolǵanyn aıtady.
A. Klebanov memlekettik qyzmettegi eńbegi úshin «Qurmet», İİİ dárejeli «Barys» ordenderimen nagradtalǵan.
Qazir Izraıl azamaty sanalatyn A. Klebanovtyń joǵaryda atalǵan Qazaqstandaǵy beldi aqparat quraldaryna ıelik etetinin forbes.kz jýrnaly da rastap otyr. Jýrnal bıznesmendi 2015 jyldyń qańtar aıynda Qazaqstannyń yqpaldy 50 bıznesmeniniń reıtıńine de engizgen.
Sondaı-aq, onyń jubaıy Dará Klebanova Parlament Májilisiniń úsh birdeı shaqyrylymynda depýtat bolǵanyn da aıta ketý kerek.
