28 قاڭتار كۇنى باتىس ايماعى بويىنشا اقتوبەدە العاش رەت باۋىر ترانسپلانتاسياسى جاسالعان بولاتىن. وبلىستىق كلينيكالىق اۋرۋحانادا سەۋل ۇلتتىق ۋنيۆەرسيتەتىنەن كەلگەن بىلىكتى ماماندارمەن بىرگە اقتوبەلىك حيرۋرگتەر 38 جاستاعى التىنگۇل يسمايلوۆانىڭ باۋىرىن اۋىستىرعان ەدى، - دەپ جازادى «اقتوبە» گازەتى.

"بۇنداي اۋىر وتا ءتۇرى وڭىردە ءبىرىنشى رەت جاسالعاندىقتان ناۋقاس پەن دونوردىڭ دەنساۋلىعىنا الاڭداۋشىلىق بىلدىرگەندەر كوپ بولدى. ءتىپتى رەداكسياعا قوڭىراۋ شالعاندار بار. وسى رەتتە ءبىز التىنگۇل مەن وعان دونور بولعان ءىنىسى ادىلبەك كۋرازوۆتىڭ حال-جاعدايىن سۇراپ، وبلىستىق اۋرۋحاناعا باردىق" - دەيدى باسىلىم ءتىلشىسى.

وتا. ءۇمىت. سەنىم

دارىگەرلەر التىنگۇلدى دۇيسەنبى كۇنى جان ساقتاۋ بولمەسىنەن پالاتاعا شىعارىپتى. ءبىز بارعاندا التىنگۇل باسىن كوتەرىپ وتىر ەكەن. ءوزىن جاقسى سەزىنەتىنىن ايتتى. التىنگۇل بالا كەزىندە سارى اۋرۋدىڭ اۋىر تۇرىنە شالدىعىپ، ۇزاق ۋاقىت ەمدەلەدى. كەيىن جانعا باتىپ اۋىرماعاندىقتان دەنساۋلىعىنا ءمان بەرمەپتى. بۇگىندە باۋىر دەرتىنە شالدىعۋىنا وسى سىرقات سەبەپ بولدى ما دەپ ويلايدى. وتكەن جىلدىڭ تامىز ايىندا باۋىرى سىر بەرە باستايدى. دارىگەرلەر تەكسەرە كەلە باۋىر سيرروزى دەگەن دياگنوز قويادى. جەدەل جاردەم جانە وبلىستىق اۋرۋحانالارعا جاتىپ ەم الىپ كورەدى. ءبىراق ناتيجە بولمايدى. دەنساۋلىعى كۇن وتكەن سايىن ناشارلاي بەرەدى. تاماققا تابەتى جويىلىپ، كەز كەلگەن يىستەن جۇرەگى اينىپ قۇسادى. دەنە تەرىسى قارايىپ، السىرەي باستايدى. اۋىرسىنۋدى باسۋعا دارى-دارمەكتىڭ دە كۇشى كەلمەيدى. دارىگەرلەر باۋىر كۇردەلى وزگەرىسكە ۇشىراپ، سيرروزدىڭ سوڭعى ساتىسىنا اۋىسقان كەزدە ونى اۋىستىرماسا بولمايتىنىن ەسكەرتەدى. التىنگۇل وسىدان كەيىن دونور ىزدەيدى. ۇلكەن اپاسى باۋىرىن بەرمەك بولعانىمەن، سايكەس كەلمەيدى.

— الداعى ءومىرىمدى، توعىز جاستاعى ۇلىمدى ويلاعاندا جۇرەگىم اۋىردى. تۋعان باۋىرلارىمدى قيىن جاعدايعا قالدىرعىم كەلمەدى. بارلىعىنىڭ وتباسى، بالا-شاعاسى بار. ولارعا «دونور بول» دەپ ايتۋعا جۇرەگىم داۋالامادى. ءبىراق وسى شاراسىز ساتتە ءىنىم ادىلبەك ەرلىك تانىتتى. مەنىڭ سۇراۋىمسىز ءوزى دونور بولۋعا كەلىستى. ۋاقىت وتكىزبەي مەديسينالىق تەكسەرۋدەن ءوتىپ، دارىگەرلەردىڭ تالابىن بۇلجىتپاي ورىندادى. وسىدان كەيىن ءۇمىت وتى ويانىپ، وتاعا دايىندالا باستادىم. دارىگەرلەر «ەرتەڭ وتا جاسايدى» دەگەن كۇنى تۇنىمەن كوز ىلمەي شىقتىم. اللادان بارلىعىنىڭ ءساتتى ءوتۋىن سۇرادىم. اسىرەسە ءىنىمنىڭ جاعدايىنا قاتتى الاڭدادىم. وتباسىن قۇرماعان، دەنى ساۋ ازاماتتىڭ الداعى ءومىرى قالاي بولادى، وتا قالاي جاسالار ەكەن دەپ قاتتى قينالدىم. وتا ۇستەلىندە جاتقاندا دا اللادان ءبىرىنشى ءىنىمنىڭ تىلەۋىن تىلەدىم، — دەيدى التىنگۇل.

ەكى بريگادانىڭ قاتىسۋىمەن جاسالعان وتا جەتى ساعاتقا سوزىلادى، ياعني ادىلبەككە ءۇش، التىنگۇلگە ءتورت ساعات بويى وتا جاسالادى.

— ءبىراق قانشا قورىقسام دا كوڭىلىمدە ءبىر ءۇمىت بولدى. سەبەبى بۇعان دەيىن وبلىستىق دەنساۋلىق ساقتاۋ باسقارماسىنىڭ باسشىسى اسەت قالييەۆ باستاعان حيرۋرگتەر قايتا-قايتا كەلىپ، مەنىڭ جاعدايىمدى ءبىلىپ وتىردى. وتا الەمگە بەلگىلى كورەيالىق حيرۋرگتىڭ قاتىسۋىمەن جاسالاتىنىن ايتىپ، جۇرەگىمە سەنىم ۇيالاتتى. دارىگەرلەردىڭ جىلى ءسوزى كوڭىلىمە دەمەۋ بولدى.

اللاعا شۇكىر، ءقازىر ءوزىمدى جاقسى سەزىنەمىن. دەنەم اعارىپ، بىرتىندەپ تاماققا دا تابەتىم اشىلا باستادى. ارينە، بۇنداي وتا جاساتۋ وڭاي ەمەس، وڭ جاق قابىرعا تۇسىم ءالى اۋىرادى. دارىگەرلەر ءجيى كەلىپ، جاعدايىمدى ءبىلىپ وتىرادى، — دەگەن التىنگۇل اۋەلى اللا، سودان كەيىن بىلىكتى حيرۋرگتەردىڭ ارقاسىندا امان قالعانىن، دەنساۋلىعىن كۇنى-تۇنى قاداعالاپ جۇرگەن وبلىستىق دەنساۋلىق ساقتاۋ باسقارماسىنىڭ باسشىسى اسەت قالييەۆكە، حيرۋرگتەر ەرلان سۇلتانگەرەيەۆ پەن ءجانادىل ءالمىرزاۇلىنا العىسى شەكسىز ەكەنىن، ولاردىڭ وتباستارىنا اماندىق، دەندەرىنە ساۋلىق تىلەيتىنىن ايتىپ، اعىنان جارىلدى.
ناۋقاستى باقىلاۋىنا العان حيرۋرگ ءجانادىل ءالمىرزا ۇلى التىنگۇلدىڭ دەنساۋلىعى ءقازىر جاقسى، قان قۇرامىنداعى بيليرۋبين مەن حولەستەرين مولشەرى قالىپتى ەكەنىن ايتتى.

— اعزانىڭ وزگە مۇشەلەرىنە قاراعاندا باۋىردىڭ قالپىنا كەلۋى تەز. وتا ءساتتى ءوتىپ، ناۋقاس ءوز دەنساۋلىعىن كۇتكەن جاعدايدا باۋىر تەز وڭالادى. باۋىرىن الماستىرعان ادام ەڭ ءبىرىنشى كەزەكتە قاتاڭ ديەتا ۇستاۋى ءتيىس. مايلى، اششى، تۇزدى جانە حولەستەرينى از تاعامداردى تۇتىنۋى قاجەت. ءبىز التىنگۇلدى تەكسەرە كەلگەن كەزدە ونىڭ س گەپاتيتىنە شالدىعىپ، سوڭى باۋىر سيرروزىنا ۇشىراعانىن بىلدىك. سيرروز دەگەنىمىز — باۋىردىڭ ءىرىپ، جارامسىز بولىپ قالۋى. ال س گەپاتيتى كوپ جاعدايدا قان ارقىلى جۇعادى جانە جۇعۋ جولى ءارتۇرلى. ءتىس ەمدەتكەننەن، دەنەگە سۋرەت سالدىرعاننان نەمەسە وزگە دە جاعدايلاردا جۇعۋى مۇمكىن. سوندىقتان ءاربىر ادام ءوز دەنساۋلىعىنا نەمقۇرايلى قاراماۋى كەرەك، — دەيدى حيرۋرگ.
دارىگەردىڭ ايتۋىنشا، التىنگۇل كۇن وتكەن سايىن جاقسارىپ كەلەدى. كەلەسى اپتادا اۋرۋحانادان شىعادى. وسىدان كەيىن ول تۇراقتى تۇردە گەپاتولوگتىڭ باقىلاۋىندا بولادى.

«اپامنىڭ دەنساۋلىعىن ويلادىم…»

اپاسىنا دونور بولعان ادىلبەك كۋرازوۆ وتكەن اپتادا اۋرۋحانادان شىعارىلىپتى. ءقازىر دەنساۋلىعى جاقسى. ءتىپتى كولىك تە جۇرگىزىپ ءجۇر.
ادىلبەك — ءۇيىنىڭ كەنجەسى. وزىنەن ۇلكەن ءتورت اپاسى بار. التىنگۇل ەكەۋىنىڭ شەشەلەرى ءبىر. اپاسى اۋىرىپ، سوڭعى كۇندەرى جاعدايى ناشارلاي باستاعاندا ادىلبەك قاتتى قينالىپتى.

— ەشكىمنىڭ كەڭەسىنسىز، ءتىپتى اپامنىڭ دا رۇقساتىنسىز كومەكتەسۋدى ويلادىم. سەبەبى مەنەن باسقالارىنىڭ بارلىعى وتباسىلى، كىشكەنتاي بوپەلەرى بار. ءبىر اپامنىڭ ايى-كۇنى جەتىپ وتىر. سوندىقتان وسىنداي قيىن كەزەڭدە ەشتەڭەگە الاڭداعانىم جوق، تەك قانا اپامنىڭ دەنساۋلىعىن ويلادىم. مەنىڭ بۇل قادامىما ۇرەيمەن قاراعاندار دا بولدى، — دەيدى ادىلبەك.

وتا ۇستەلىندە جاتقاندا ادىلبەكتىڭ بويىندا ايتارلىقتاي قورقىنىش بولماپتى، تەك قانا اللادان اپاسىنىڭ اياققا تۇرىپ كەتۋىن تىلەيدى.
ادىلبەك قيىن كۇندەردىڭ ۇمىتىلىپ، ءبارى جاقسى بولاتىنىنا سەنەدى.

— وتادان كەيىنگى كۇندەر وتە اۋىر بولدى. ءبىراق شىداۋعا تىرىستىم. ەكى اپتادان ارتىق ۋاقىت اۋرۋحانادا جاتتىم. ءقازىر، شۇكىر، ازداپ وڭ جاق قابىرعامنىڭ استى اۋىراتىنى بولماسا، جاعدايىم جاقسى، — دەيدى ول.

ادىلبەك بيىل 26 جاسقا تولادى. ءساتىن سالسا جازدا وتباسىن قۇرماق. ءقازىر بولاشاق جارى گۇلدەن اناسىنا قولعابىس ەتىپ، ادىلبەكتىڭ دەنساۋلىعىن كۇتىپ ءجۇر. قيىن كەزدەردە ادىلبەكتىڭ ارىپتەستەرى دە قولداۋ ءبىلدىرىپتى. قالاداعى №6655 اسكەري ءبولىمىنىڭ قىزمەتكەرلەرى قارجىلاي كومەك بەرسە، فەلدشەر نۇرلان قۇتتىبايەۆ ادىلبەكتىڭ دەنساۋلىعىن قاداعالاپ وتىرادى.
— ماعان قولداۋ بىلدىرگەن بارلىق ازاماتتارعا العىسىم شەكسىز. اسىرەسە، وبلىستىق دەنساۋلىق ساقتاۋ سالاسىنىڭ قىزمەتكەرلەرىنە ريزامىن. اۋرۋحانانىڭ ءىشى مۇنتازداي تازا، دارىگەرلەردىڭ كوزقاراسى ەرەكشە. بارلىعى بايەك بولىپ ءجۇر، — دەيدى ول.

دارىگەرلەر ادىلبەككە دەنساۋلىعىن كۇتىپ جۇرسە، جارتى جىلدان كەيىن باۋىرى قالىپقا كەلەتىنىن ايتىپتى. ءقازىر ول ۋاقىتىندا ءدارىسىن ءىشىپ، وزىنە سالماق سالماۋعا تىرىسادى.

«اقتوبە» گازەتى