ءال-فارابي اتىنداعى قازۇۋ-دا ۋنيۆەرسيتەت باسشىلىعى مەن  يۋنەسكو-نىڭ الماتى قالاسىنداعى كلاستەرلىك بيۋروسى ديرەكتورىنىڭ قىزمەتىن اتقارۋشى اندرەي شيەۆەليەۆتىڭ  كەزدەسۋى ءوتتى، - دەپ حابارلايدى «قامشى» پورتالى ۋنيۆەرسيتەتتىڭ باسپا ءسوز قىزمەتىنە سىلتەمە جاساپ.

ا.شيەۆەليەۆ مىرزا الدىمەن قازۇۋ مۇراجايىن ارالاپ، ۋنيۆەرسيتەتتىڭ تاريحىمەن جانە جەتىستىكتەرىمەن تانىستى.  

كەزدەسۋدى اشقان ءال-فارابي اتىنداعى قازۇۋ رەكتورى عالىم مۇتانوۆ بۇگىنگى تاڭدا ۋنيۆەرسيتەت پەن يۋنەسكو اراسىندا تىعىز قارىم-قاتىناس ورناپ، جەمىستى جۇمىستار اتقارىلىپ جاتقاندىعىن اتاپ ءوتتى.  «ۋنيۆەرسيتەتىمىزدىڭ العا قويعان ماقساتى، باستامالارى مەن دامۋ ستراتەگياسى يۋنەسكو تاراپىنان ۇنەمى قولداۋعا يە بولىپ كەلەدى. بۇل ءبىز ءۇشىن ۇلكەن مارتەبە ءارى زور جاۋاپكەرشىلىك»، – دەدى ول. سونىمەن قاتار ول ۋنيۆەرسيتەتتە يۋنەسكو، حالىقارالىق جۋرناليستيكا جانە قوعاممەن بايلانىس كافەدراسىنىڭ 20 جىلعا جۋىق جۇمىس ىستەپ كەلە جاتقاندىعىن ايتتى.

كەزدەسۋ بارىسىندا باستى ءۇش ماسەلە – بيوەتيكا، جۋرناليستيكا جانە تۇراقتى دامۋ بويىنشا ءبىلىم بەرۋ باعىتىنا باسا نازار اۋدارىلدى.

«ءبىلىم قولجەتىمدى بولماعان جاعدايدا وقىماعان ادامداردىڭ ەكسترەميستەر مەن لاڭكەستەردىڭ قاتارىن مولايتا ءتۇسۋ ءقاۋپى ارتادى. سوندىقتان دا ءبىز ءبىلىمنىڭ، ونىڭ ىشىندە جوعارى ساپالى ءبىلىمنىڭ ماڭىزدىلىعىن جەتە تۇسىنەمىز»، – دەدى اندرەي شيەۆەليەۆ.

يۋنەسكو كلاستەرلىك بيۋروسىنىڭ ءبىلىم سالاسى بويىنشا مامانى ايگۇل حالافوۆا: «سوڭعى 15 جىلدىڭ ىشىندە، دالىرەك ايتقاندا، 2000 جىلدان 2015 جىلعا دەيىنگى ءبىلىم بەرۋ جۇيەسىندەگى دامۋ مەن كەمشىلىكتەر بەينەلەنگەن يۋنەسكو-نىڭ ستاتيستيكالىق مالىمەتتەرى بويىنشا، قازاقستاننىڭ جەتكەن جەتىستىكتەرى كوز قۋانتادى. وعان سىزدەردىڭ ۋنيۆەرسيتەتتەرىڭىزدىڭ سىڭىرگەن ەڭبەگى زور. قازۇۋ – زامانعا ساي ءتۇرلى سالادا كاسىبي ماماندار دايىندايتىن ىرگەلى وقۋ ورنى»، – دەپ پىكىر ءبىلدىردى.

سونداي-اق كەزدەسۋدە بۇۇ-نىڭ تۇراقتى دامۋ بويىنشا جاھاندىق حابى بولىپ تابىلاتىن قازۇۋ مەن بۇۇ،  يۋنەسكو سىندى بەلدى حالىقارالىق ۇيىمدار بىرلەسىپ جۇزەگە اسىراتىن ماڭىزدى شارالار دا قوزعالدى. اتاپ وتسەك، لاڭكەستىك پەن ءدىني ەكسترەميزمگە قارسى كۇرەس بويىنشا حالىقارالىق كونفەرەنسيا ۇيىمداستىرۋ، الماتى قالاسىنان باستاۋ الاتىن حالىقارالىق «بەيبىتشىلىك جانە كەلىسىم مارشىن» وتكىزۋ جانە   «نيەۆادا سەمەي» حالىقارالىق انتيادرولىق قوزعالىس پرەزيدەنتى ولجاس سۇلەيمەنوۆتىڭ 80 جىلدىق مەرەيتويىنا اتسالىسۋ سىندى ماسەلەلەر قارالدى.